Tbilisi. 13 fevral. REPORT.AZ/ Fevralın 15-dən 19-dək Gürcüstanın azərbaycanlıların yığcam yaşadıqları Marneuli şəhərində gənclər arasında boks üzrə Gürcüstan çempionatı keçiriləcək.
“Report”un Gürcüstan bürosu xəbər verir ki, Gürcüstan Milli Boks Federasiyasının təşkil etdiyi çempionatda Gürcüstan vətəndaşı olan 7 nəfər azərbaycanlı gənc də mübarizə aparacaq.
Bu idman yarışmasında azərbaycanlılarla yanaşı, gürcü və digər millətlərin nümayəndələri də güclərini sınayacaqlar.
Çempionat Marneuli şəhərindəki “Ata Holdinq” salonunda təşkil olunacaq.