Cəbrayıl. 15 fevral. REPORT.AZ/ "Buraya baş verənlər haqqında məlumat almaq üçün, peşəkar məqsədlə gəlmişik və məqsədimizə nail olduq".
"Report"un Qarabağ bürosunun məlumatına görə, bunu Rusiyanın Azərbaycandakı səfiri Vladimir Doroxin Azərbaycanda qeydiyyatdan keçmiş diplomatik missiya rəhbərlərinin erməni işğalından azad olunmuş Cəbrayıl rayonunun Cocuq Mərcanlı kəndini ziyarəti zamanı deyib.
Onun sözlərinə görə, bu kəndə səfər etmək nümunəvi addımdır: "Burada emosional məqam da var. Çünki Dağlıq Qarabağ münaqişəsinin nə dərəcədə ağır və çətin olduğunu gözlərimizlə növbəti dəfə gördük. Münaqişə haqqında oxumaq, eşitmək başqadır, hər şeyi öz gözlərinlə görmək, insanlarla danışmaq başqa. Bu mənada bu, bizim üçün daha bir siqnaldır. Hər halda, mən özüm üçün müəyyən nəticə çıxardım. Rusiya bu münaqişənin sülh yoluyla həlli ilə məşğul olub və bunu etməyə davam edəcək".
