Bakı. 15 fevral. REPORT.AZ/ Suriyanın Əl-Bab bölgəsində terrorçu İŞİD qruplaşması silahlılarının Bəşşər Əsəd rejiminə müxalif olan Suriya Azadlıq Ordusunun (SAO) müvəqqəti düşərgəsinə bomba yüklənmiş avtomobillə hücum edərkən 8 terrorçu zərərsizləşdirilib.
“Report” Türkiyə KİV-inə istinadən xəbər verir ki, bu barədə Türkiyə Silahlı Qüvvələri Baş Qərargahı məlumat yayıb.
Xəbərdə bildirilib ki, avtomobildəki iki terrorçu-kamikadzenin özünü partlatması nəticəsində isə SAO-nun 7 əsgəri həlak olub.
Məlumata görə, bölgədəki Türkiyə hərbçiləri xəsarət almayıb.
Xəbərdə qeyd olunub ki, Baş Qərargah Əl-Babın böyük hissəsini terrorçulardan təmizlədiklərini və əməliyyatın davam etdiyini bildirib.
