Sabah baş tutacaq “Qəbələ” – “Qarabağ” matçının bol qollu alınması futbolsevərlərin arzusudu. Fanat.Az-ın hesablamalarına görə əsası 2006/07 mövsümündə qoyulan mübarizələr çərçivəsində indiyədək 40 dəfə qarşılaşan tərəflər 87 qol vurub. Qəbələlilər 37 dəfə qol sevinci yaşayıbsa (bunlardan birini hazırda “Neftçi”də oynayan Namiq Ələsgərov öz qapısına vurub), “köhlən atlar” 50 dəfə sözünü deyib.
Ölkə birinciliyinə təsadüf edən 34 qarşılaşmada isə ümumilikdə 78 qol tarixin yaddaşına qovuşub. Bu göstəricidə də “Qəbələ” (32) “Qarabağ”dan (46) geri qalır.
“Qırmızı-qaralar”ın geridə qalan 20 ev oyunundan danışsaq, meydan sahibləri yenə geri qalır. Hər halda fərq o qədər də diqqətçəkən deyil – 21:23.
“Qəbələ” tarixində “Qarabağ”a ən çox top vuran oyunçu indi Roman Qriqorçukun sərəncamında olmayan Dododu. Dodo 5 dəfə ağdamlıları oyuna mərkəzdən başlamağa məcbur edib.
Ağdam klubunun “qatil oyunçu”sunun da Dodo kimi, ölkədən getməsi özlüyündə maraqlı məqamdı. 8 dəfə “Qəbələ”ni cəzalandırmaqla bu yöndə rəqib tanımayan Reynaldo Silva daha “Qarabağ”ın yox, “Adanaspor”un uğurları üçün tər tökür.
Fanat.Az
