Ərəb dilindən tərcümədə təvəlla - dostluq, təbərra isə üz çevirmək, rədd etmək mənasını verir. Bunlar müsəlman əxlaqının ən vacib xüsusiyyətləridir. Cəfəri məzhəbində təvəlla və təbərra fürui-dindən sayılır.
Milli.Az islam.az-a istinadən bildirir ki, təvəllanın mənası budur ki, müsəlman hər zaman Allahın sevdiyi insanları sevməli, Allahın mömin bəndələri ilə, haqqın tərəfdarları ilə dostluq və həmrəylik halında olmalıdır. Təbərra isə bu deməkdir ki, müsəlman həmişə Allahın düşmənləri ilə düşmənçilik etməli, Allahın sevmədiyi insanlardan üz çevirib uzaqlaşmalıdır. Həzrət Mühəmməd Peyğəmbər (s) buyurmuşdur: "İman zəncirinin ən möhkəm halqası - Allah naminə sevmək və Allah naminə düşmənçilik etməkdir, Allahın dostları ilə dost olmaq və Allahın düşmənlərindən kənar durmaqdır".
Təvəlla və təbərra yalnız insanın öz müasirlərinə münasibəti ilə məhdudlaşmır. Allah dostları həyatda olmasalar da, ruhları ehtiramla yad edilməli, əməlləri təqdir olunmalı, sözləri mötəbər sayılmalıdır. Əksinə, din və əqidə düşmənlərinin həm ruhu, həm ideologiyası, həm də söz və əməlləri rədd edilməli, onların çirkin siması tanıtdırılmalıdır.
Təvəlla və təbərranı imkan dairəsində əməllə, bu mümkün olmadıqda dillə icra etmək lazımdır. Əgər şərait bunlara imkan verməsə, heç olmazsa, insan ürəyində yaxşı və pis adamlara öz münasibətini bildirməlıdir.
Milli.Az
Digər maraqlı xəbərlər Milli.Az-ın Facebook səhifəsində