Moskva. 21 fevral. REPORT.AZ/ Moskvada Rusiya İctimai Palatasında Azərbaycan-Rusiya əlaqələrinin 25 illiyinə həsr olunmuş "Müasir dünyada diasporlar. Rusiyanın ictimai həyatında Azərbaycan diasporunun rolu" mövzusunda "dəyirmi masa" keçirilib.
"Report"un Moskva müxbirinin verdiyi məlumata görə, tədbirin təşkilatçıları qismində İctimai Palatanın ictimai diplomatiyanın inkişafı və xaricdəki soydaşlara dəstək Komissiyası ilə Azərbaycan-Rusiya Mədəniyyət və Həmrəylik Mərkəzi çıxış edib.
Tədbirdə Rusiyada milli diaspor problemləri, ölkədə vətəndaşların milli-mədəni özünüifadəsinə qarşı olmayan identikliyin yaradılması məsələsi müzakirə edilib. Bu baxımdan Azərbaycan diasporunun fəaliyyəti nümunə kimi göstərilib. Rusiyada yaşayan azərbaycanlıların özlərini rusiyalı saydığı, amma eyni zamanda vətənlə sıx əlaqləri qoruduqları, milli mədəniyyəti və ənənələri unutmadıqları, hətta yaşadıqları ölkədə bunlartı təbliğ etdikləri vurğulanıb.
Müzakirələrdə Azərbaycanın Rusiyadakı səfirliyinin, Rusiya Federasiyası Prezidenti yanında Millətlərarası Münasibətlər Şurasının, Millətlərin İşi üzrə Federal Agentliyin, Ümumrusiya Azərbaycan Konqresinin, Rusiya Azərbaycanlılarının Federal Milli-Mədəni Muxtariyyətinin nümayəndələri, ictimai xadimlər, Azərbaycan diasporunun fəalları iştirak ediblər.