Bakı. 22 fevral. REPORT.AZ/ Futbol üzrə 2026-cı il dünya çempionatında Avropanı təmsil edəcək ölkələrin sayı gələn ay UEFA toplantısında müzakirə olunacaq. "Report"un məlumatına görə, bu barədə qitə futbol qurumunun prezidenti Aleksander Çederin "Habertürk"ə müsahibəsində bildirib.
Sloveniyalı funksioner deyib ki, FİFA-dan mundialda Avropaya ən azı 16 yerin ayrılmasını və 16 qrupun hər birində "köhnə qitə"dən bir ölkənin təmsil olunmasını istəyəcəklər: "Bu, bizim minimal istəyimiz olacaq. Digər konfederasiyalar kimi UEFA da dünya çempionatının yeni formatını dəstəkləməyə razı olub. Çempionatın müddətinin uzun olmaması, oyun yükünün eynilə qalması bizi qane edir".
A.Çeferin dünya çempionatının seçmə mərhələsində zəif sayılan ölkələrin ayrıca mübarizə aparması təklifi ilə razılaşmadığını da vurğulayıb. Onun fikrincə, hər bir komanda bütün yarışlara qatılmaq hüququna malik olmalıdır: "Əvvəlki yarışlardan nümunələr göstərə bilərik ki, bir çox kiçik ölkə həm seçmə, həm də final mərhələsində sərgilədikləri oyunla çox yaxşı təsir bağışlayıb. Bu isə onu göstərir ki, şans verildikdə futbolda hər şey mümkündür. Ona görə də hamıya eyni imkan yaradılacaq. Belə ayrıseçkilik etməyəcəyik".
Qeyd edək ki, hazırda dünya çempionatı 32 ölkənin iştirakı ilə keçirilir.
