[ 07 Yanvar 2015 09:42 ]
Bakı. Aynur Əliyeva - APA-Economics. “Bakı Metropoliteni” QSC-nin “Nizami” stansiyasında fəaliyyət göstərən 3 saylı eskalator əsaslı təmirə dayandırılır.
Bunu “APA-Economics”ə “Bakı Metropoliteni”nin İctimaiyyətlə əlaqələr və mətbuat katibliyinin rəhbəri Nəsimi Paşayev məlumat verib.
N. Paşayev bildirib ki, bununla bağlı bütün hazırlıqlar görülüb: “Yanvarın 8-dən təmirə dayandırılacaq eskalatorun bütün hissələri söküləcək. Fevralın 7-ə qədər eskalatorun yenidən istifadəyə verməsi planlaşdırılır”.
Qeyd edək ki, 3 saylı eskalatorun əsaslı təmirə dayandırılması planlaşdırılmış işlər çərçivəsində həyata keçirilir. Hər bir eskalator müəyyən edilmiş yürüş məsafəsini tamamladıqdan sonra cari və əsaslı təmirə dayandırılır.
