İspaniyanın "Real" klubu "Vilyareal"la 2:0 hesabı ilə geridə olduğu matçda qələbə qazanıb.
Metbuat.az xəbər verir ki, fevralın 27 İspaniya La Liqası çərçivəsində baş tutan görüşdə ev sahibləri oyunun 50-ci dəqiqəsində Triqeros və 56-cı dəqiqədə Bakambunun qolları ilə 2:0 hesabı ilə irəli keçiblər.
Matçın 64-cü dəqiqəsində Karvaxalın ötürməsindən sonra, Qaret Beyl hesab arasındakı fərqi minimuma endirib. Oyunun 74-cü dəqiqəsində cərimə meydançasında əllə oyuna görə hakim Vilyarealın qapısına 11 metrlik cərimə zərbəsi təyin edib. Kriştiano Ronaldo bu fürsəti əldən qaçırmayıb - 2:2.
83-cü dəqiqədə Marselonun sol cinahdan ötürdüyü topu Alvaro Morata başla qapıya göndərib və oyun 2:3 hesabı ilə yekunlaşıb.
Qeyd edək ki, bu qələbəylə "Kral" klubu İspaniya çempionatındakı liderliyini qoruyub saxlayıb.
Əsmər / Metbuat.az
