Banklar bir-birinə verdiyi manat kreditini bahalaşdırıblar. Fins.az Mərkəzi Bankın statistikasına istinad edərək xəbər verir ki, 2017-ci ilin yanvar ayında banklararası kreditlər üzrə orta faiz dərəcəsi manatla 10.86%, xarici valyuta ilə təxminən onun yarısı yəni, 5.42% olub. Bu isə 2016-cı ilin eyni ayı ilə müqayisədə manatla olan kreditlərdə özünü artımla, xarici valyuta ilə olan kreditlərdə cüzi azalma ilə göstərib.
Belə ki, manatla olan kreditlər üzrə orta faiz dərəcəsi 5.65%, xarici valyuta ilə olan kreditlər üzrə orta faiz dərəcəsi 5.89% olub.
Banklararası kreditlər müddətlərinə görə də qruplara ayrılır. Yəni, 30 günədək olan kreditlər üzrə faiz dərəcəsi manatla 1.73%, xarici valyuta ilə 4.30% olub. Müqayisə aparsaq görərik ki, ötən il manatla verilən kreditlər üzrə faiz dərəcəsi 1.15%, xarici valyuta ilə verilən kreditlər üzrə isə 2.82% olub.
Statistikadan göründüyü kimi, 30 gündən 90 günədək olan kreditlər üzrə faiz dərəcəsi 30 günədək olan kreditlər üzrə faiz dərəcəsindən kəskin sürətdə fərqənir. Deməli, 3 aylıq kreditlərdə manatla olan faiz dərəcəsi 11.9 dəfə yüksəkdir - 20.62% təşkil edir. Xarici valyuta ilə olan kreditlər üzrə faiz dərəcəsi isə 4 dəfə cox - 17.22% olub. Statistika göstərir ki, 30 gündən 90 günədək olan kreditlər üzrə faiz dərəcəsi digərlərinə nisbətdə çox yüksəkdir.
90-180 günlük kreditlər üzrə faiz dərəcəsi isə manatla 16.92%, xarici valyuta ilə 10.72% təşkil edib. 180-360 günlük kreditlər üzrə faiz dərəcəsi manatla 8.73%, xarici valyuta ilə isə 5.60% olub. Və nəhayət 1 ildən yuxari müddətə verilən kreditlər üzrə faiz dərəcəsi manatla 8.94%, xarici valyuta ilə isə 4.71% olub.
Statistikadan görünür ki, 30 günədək olan kreditlər üzrə faizlər istisna etməklə, digərlərində manatla verilmiş kreditlər üzrə faiz dərəcəsi xarici valyuta ilə verilmiş kreditlər üzrə faiz dərəcəsindən çoxdur.
