Bakı. 27 fevral. REPORT.AZ/ Məşhur şair Mikayıl Müşfiqin Bakıdakı abidəsinin götürülməsi ilə bağlı məsələyə Mədəniyyət və Turizm Nazirliyi və “Azəravtoyol” ASC münasibət bildirib.
Mədəniyyət və Turizm Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin rəhbəri Zakir Sultanov “Report”a açıqlamasında bunu sərt tənqid edib: “Buna görə “Azəravtoyol” ASC cəzalandırılacaq. Çünki bununla bağlı nazirliyə heç bir xəbərdarlıq edilməyib. Əbülfəs Qarayev məsələdən bu gün xəbərdar olub. Nazirin reaksiyası çox pis oldu. Abidənin yeri müəyyənləşdirildikdən sonra yəqin ki, başqa bir yerə köçürüləcək”.
“Azəravtoyol” ASC-nin mətbuat xidmətinin rəhbəri Anar Nəcəfli isə “Report”a bildirib ki, abidə təmir işlərindən sonra yerinə qaytarılacaq və ətrafı yaşıllaşdırılacaq : ““Azəravtoyol” ASC vandal deyil ki, hansısa tarixi bir abidəni məhv edə... Ərazidə prezidentin sərəncamına uyğun olaraq abadlaşdırma işləri aparılır. Abidə hazırda “Azəravtoyol” ASC-nin anbarında mühafizə olunur. İşlər yekunlaşdıqdan sonra əvvəlki yerinə qaytarılacaq. Abidəni köçürməkdə məqsədimiz onun zərər görməməsi olub”.
