Belaruslu gimnast Olqa Korbut 1972 və 1976-cı il Yay Olimpiya Oyunlarında qazandığı 5 medalı hərraca çıxarıb.
Milli.Az report-a istinadən xəbər verir ki, satışdan ümumilikdə 180 min dollardan çox gəlir əldə olunub.
1972-ci il Münhen olimpiadasında komanda yarışında və sərbəst hərəkətlər üzrə qızıl medallar müvafiq olaraq, 66 min dollar və 52,8 min dollara, barlarda hərəkət üzrə gümüş medal 24,6 min dollara satılıb. 1976-cı il Monreal olimpiadasında komanda yarışındakı qızıl medal alıcıya 57,6 min dollara, tir üzərində hərəkət üzrə gümüş medal 24,6 min dollara başa gəlib. Hərrac evinin mükafatı ilə birgə Korbut 183,3 min dollar qazanıb.
61 yaşlı idmançı medallardan əlavə, 1973-cü ildə Böyük Britaniyanın paytaxtı Londonda çıxış etdiyi gimnast geyimini 3 min dollara, "Sports Illustrated" jurnalının üz qabığında təsviri ilə birgə avtoqrafı 49 dollara satıb. Onun 26 lot əşyası satılmamış qalıb.
Qeyd edək ki, Olqa Korbut 4 qat olimpiya çempionu və 2 qat olimpiya mükafatçısıdır. O, "Münhen-1972"də 3 qızıl və 1 gümüş, "Monreal-1976"da 1 qızıl və 1 gümüş medal qazanıb.
Milli.Az
Digər maraqlı xəbərlər Milli.Az-ın Facebook səhifəsində
