Bakı. 28 fevral. REPORT.AZ/ Azərbaycan akrobatları Ukraynanın Vinnitsa şəhərində keçirilmiş beynəlxalq turnirdə 3 medal qazanıblar. "Report"un Azərbaycan Gimnastika Federasiyasının rəsmi saytına istinadən verdiyi məlumata görə, medallardan birini 13 - 19 yaş kateqoriyasında çıxış edən Abdulla Əl-Məşayxi və Ruhidil Qurbanlıdan ibarət qarışıq cütlük əldə edib.
Onlar çoxnövçülükdə 82.160 xalla bütün rəqiblərini üstələyiblər.
Eyni yaş kateqoriyasında mübarizə aparan Ağasif Rəhimov və Nurcan Cabbarlıdan ibarət digər qarışıq cütlük 81.400 xalla bürünc medal qazanıb.
Beynəlxalq arenada debüt edən qadın qrupunda (12 - 18 yaş) Emiliya Nəzərli, Raziyə Seyidli və Ləman Məmmədova da turniri medalsız tərk etməyiblər. Onlar çoxnöxçülükdə hakimlərdən 79.960 xal alaraq bürünc medala sahib olublar.
