Bakı. 3 mart. REPORT.AZ/ Kabardin-Balkar Respublikasında Çeqet dağında qar uçqunu nəticəsində iki nəfər ölüb, bir nəfər xəsarət alıb.
“Report” BBC-yə istinadən xəbər verir ki, bunu Rusiya Fövqəladə Hallar Nazirliyinin Elbrusun yüksək dağlıq hissəsində axtarış-xilasetmə dəstəsinin əməkdaşı Alberx Xadijiyev bildirib.
“Hazırda biz fəlakət bölgəsində başqa adamların qalıb-qalmamasını araşdırırıq”, - deyə o vurğulayıb.
Məlumata görə, uçqun martın 3-də günorta saatlarında baş verib. Hadisə yerində axtarış-xilasetmə dəstəsinin 11 əməkdaşı və iki texnika fəaliyyət göstərir.
Çeqet dağı turist bölgəsidir. Orada dağ-xizək idman mərkəzi yerləşir.