Azay Quliyev: “Mehriban Əliyevanın təyinatı böyük sevinclə qarşılanıb”

Azay Quliyev: “Mehriban Əliyevanın təyinatı böyük sevinclə qarşılanıb”
13:48 7 Mart 2017
49 Digər
Ölkə mətbuatı
A- A+

“Mehriban Əliyevanın ali dövlət vəzifəsinə təyin olunması ölkə vətəndaşları, dünyada yaşayan soydaşlarımız tərəfindən böyük sevinc hissi ilə qarşılanıb”.

Publika.az xəbər verir ki, bunu Milli Məclisin bu gün keçirilən plenar iclasında çıxışı zamanı deputat Azay Quliyev bildirib.

A.Quliyev deyib ki, Azərbaycanın Birinci xanımının yüksək vəzifəyə təyin olunması dünya ictimaiyyəti tərəfindən təqdir edilir:

“Bu da təsadüfi deyil. Ona görə ki, siz geniş ictimai-siyasi və beynəlxalq fəaliyyətinizlə həm ölkə daxilində, həm də ölkə hüdudlarından kənarda çox böyük rəğbət qazanmısınız. Sizin Ulu Öndərin ölməz ideyalarını həyata keçirən, milli dövlətçilik məfkurəsini gələcək nəsillərə çatdıran fəaliyyətiniz haqqında saatlarla danışmaq olar. Təkcə Heydər Əliyev Fondunun qurucusu və prezidenti olaraq gördüyünüz işlərə görə hər kəs sizə hörmət edir”.

Deputat qeyd edib ki, Mehriban Əliyeva Azərbaycanda kimsəsizlər və köməyi ehtiyacı olanların ümid yeri, dayağıdır:

“Azərbaycanda humanizm, xeyriyyəçilik ənənələrinin canlanması Sizin adınızla bağlıdır. Siz Milli Məclisin deputatı kimi məhbəsdə olan vətəndaşlarımızın amnistiya aktı ilə azadlığa çıxmasına, onların bağışlanmasına nail olmusunuz. Qədim muğam sənəti Sizin sayənizdə özünün intibah dövrünü yaşayır. YUNESKO tərəfindən bəşəriyyətin qeyri-maddi, şifahi irsinin şah əsəri kimi qorunur. Hörmətli Mehriban xanım, Siz dünya mədəniyyətinə və sivilizasiyalararası dialoqa çox böyük töhfə vermisiniz. Ümumdünya mədəni irsin bir hissəsi olan Vatikandakı müqəddəs yerləri bərpa etməyiniz çox böyük addımdır. Bu, bir müsəlman ölkəsinin xristianlıq ənənələrinin qorunub saxlanmasına göstərdiyi xoşgörüdür. Bütün Qərb mətbuatı sizin sanbalı töhfələrinizi alqışlayır, təqdir edir. Siz Azərbaycanın ərazi bütövlüyünün, suverennliyinin bərpası, uğrunda prinsipial mübarizə aparırsınız. Qeyri-hökumət təşkilatlarına və vətəndaş cəmiyyətlərinə verdiyiniz dəstək və qiymətə, bu istiqamətdə yorulmaz fəaliyyətinizə görə, Sizə ictimaiyyət adından təşəkkür edirəm. Əminəm ki, Azərbaycanın daha da inkişaf etmiş ölkəyə çevrilməsində Birinci vitse-prezident kimi böyük nailiyyətlərə imza atacaqsınız”.

Vasif Həsənli


Xəbərin orijinal ünvanı: http://publika.az/news/nida_xeber/190482.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR