“Eutelsat Communications” və “ViaSat” şirkətləri Avropada genişzolaqlı internet xidmətləri göstərmək üçün birgə müəssisə yaradıb. Müəssisənin əsasını şirkətlərin genişzolaqlı şəbəkələr və ən yeni genişzolaqlı texnologiyalar, eləcə də internet provayderi kimi fəaliyyət sahələrində təcrübələri təşkil edir. Tərəfdaşlıq çərçivəsində “Eutelsat” Avropada genişzolaqlı internet xidmətlərinin topdansatış sahəsində biznesini genişləndirə, eləcə də konkret istehlakçılara pərakəndə satış xidmətləri göstərməyə başlaya biləcək.
“ICTnews” Elektron Xəbər Xidməti “Mediasat” resursuna istinadən yazır ki, mənzil-qərargahı Lozannada (İsveçrə) yerləşən birgə müəssisə Avropa genişzolaqlı internet bazarının fəthinə yönələn səyləri əlaqələndirən “Wholesale Services” (Topdansatış xidmətlər şöbəsi) və “Retail Services” (Pərakəndə satış xidmətlər şöbəsi) bölmələrdən ibarət olacaq. “Eultesat” birinci bölmədə səhmlərin 51 faizinə, ikinci bölmədə 49 faizinə sahibdir. “Viasat” isə əksinə, ikinci bölmədə səhmlərin 51 faizinə, birinci bölmədə 49 faizinə sahib çıxıb.
“Wholesale Services” şöbəsi diqqəti Avropa və Aralıq dənizi ölkələrində yeni Avropa pərakəndə satış şirkətləri və mövcud distributorlar üçün topdansatış genişzolaqlı internet və mobil rabitə xidmətlərinin göstərilməsinə yönəldəcək.
“Retail Services” şirkətinin fəaliyyəti Avropa və Aralıq dənizi ölkələrində pərakəndə satış müştərilərinə genişzolaqlı internet xidmətlərini təklif etməkdən ibarət olacaq.
Nizam Nuriyev
