XİN başçısı: "Böyük Britaniya ATƏT-in Minsk qrupun səylərini dəstəkləyir"

XİN başçısı: "Böyük Britaniya ATƏT-in Minsk qrupun səylərini dəstəkləyir"
18:17 13 Mart 2017
76 Ölkə
Ölkə mətbuatı
A- A+

Bakı. 13 mart. REPORT.AZ/ Azərbaycan və Böyük Britaniya xarici işlər nazirləri arasında diplomatik münasibətlərin 25 illiyi ilə bağlı təbrik məktubu mübadiləsi həyata keçirilib.
Azərbaycanın Xarici İşlər Nazirliyinin mətbuat xidmətindən "Report"a verilən məlumata görə, xarici işlər naziri Elmar Məmmədyarov Böyük Britaniyadan olan həmkarına ünvanladığı məktubunda Azərbaycan və Böyük Britaniyanın ötən illər ərzində iki xalq üçün qarşılıqlı fayda verən möhkəm və konstruktiv dialoq qurmağa nail olduğunu qeyd edib.
E.Məmmədyarov beynəlxalq sülh və təhlükəsizliyin qorunmasında iki ölkənin yaxın əməkdaşlığının davam etdiyini bildirib.
Nazir Azərbaycan və Böyük Britaniyanın iqtisadi sahədə əlaqələri, xüsusilə BP şirkətinin Bakı-Tbilisi-Ceyhan və Bakı-Tbilisi-Ərzurum neft və qaz boru kəmərləri kimi regional enerji layihələrində iştirakının ikitərəfli əməkdaşlığın əsas sütununu təşkil etdiyini vurğulayıb.
E.Məmmədyarov həmçinin ikitərəfli siyasi dialoq və hökumətlərarası birgə iqtisadi komissiya daxil olmaqla yeni dialoq formatlarının Azərbaycan və Böyük Britaniya arasında əməkdaşlığın daha da dərinləşməsinə xidmət edəcəyinə əminliyini ifadə edib.
Böyük Britaniya xarici işlər naziri Boris Conson E.Məmmədyarova ünvanladığı məktubunda ölkəsinin ötən 25 il ərzində Azərbaycanla əməkdaşlığına böyük əhəmiyyət verdiyini bildirib. 2017-ci ilin iki ölkə arasında ikitərəfli əməkdaşlıq baxımdan önəmli il olduğunu vurğulayan B.Conson Azərbaycan və Böyük Britaniyanın enerji sahəsində əməkdaşlığından məmnun olduğunu qeyd edib.
O, həmçinin ölkəsinin Ermənistan-Azərbaycan Dağlıq Qarabağ münaqişəsinin sülh yolu ilə həll edilməsi istiqamətində ATƏT-in Minsk qrupu həmsədrlərinin fəaliyyətini dəstəkləməkdə davam etdiyini vurğulayıb.
Britaniyalı nazir iki ölkə arasında qarşılıqlı maraq doğuran müxtəlif sahələr üzrə əlaqələrin daha da dərinləşdirilməsi və əməkdaşlığın davamlı olacağına əminliyini ifadə edib.

Xəbərin orijinal ünvanı: https://report.az/xarici-siyaset/xi-n-bascisi-britaniya-atet-in-minsk-qrupun-seylerini-destekleyir

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR