“ABAD” sənətkarlıq mərkəzi fəaliyyətə başladı - FOTO

“ABAD” sənətkarlıq mərkəzi fəaliyyətə başladı - FOTO
12:57 18 Mart 2017
233 Ölkə
Ölkə mətbuatı
A- A+

Martın 18-də "ABAD"a qoşulan ailələrin məhsullarının nümayişini həyata keçirtmək üçün "İçərişəhər" Dövlət Tarix-Memarlıq Qoruğu ərazisində "ABAD" sənətkarlıq mərkəzi fəaliyyətə başlayıb.

Milli.Az xəbər verir ki, "ABAD" publik hüquqi şəxsin fəaliyyətinin prioritet istiqamətləri dekorativ-tətbiqi xalq sənətkarlığı və kənd təsərrüfatı sahəsində fəaliyyət göstərən ailə bizneslərinə dəstək göstərməkdir. Bu sahədə ilkin olaraq Masallı, Balakən, İsmayıllı, Şəki və Bakı şəhərindən ümumilikdə sənətkarlıqla bağlı 63, kənd təsərrüfatı sahəsi üzrə isə 30 ailə seçilib.

İlkin mərhələdə "ABAD" sənətkarlıq mərkəzində 63 ailənin 500 adda 2000-dən çox sənət nümunəsi, 5 ailənin isə 10 adda kənd təsərrüfatı məhsulları (cem, mürəbbə, bal) satışa çıxarılacaqdır.

Təqdim olunan bütün məhsullar onu istehsal etmiş sənətkarın, ailə təsərrüfatının loqotipi ilə işarələnib və üzərində xüsusi "ABAD" leybli yerləşdirilib. Bu loqotip və "ABAD" leyblinin olması həmin məhsulun orijinallığından xəbər verir.

"ABAD" bir sıra beynəlxalq təşkilatlarla, o cümlədən də BMT-nin İnkişaf Proqramı (UNDP) ilə əməkdaşlıq edir. Əməkdaşlıq çərçivəsində, ailələrin biznesə cəlb edilməsini təşviq etmək üçün bir ailənin istehsal avadanlıqları ilə təchiz olunmuş ət məhsulları istehsalı konteyneri ilə təmin olunmasında UNDP maliyyə dəstəyi göstərib.

Azərbaycan Dövlət Neft Şirkəti (SOCAR) və "ABAD" arasında 2016-cı ilin noyabr ayında imzalanan əməkdaşlıq sazişinə əsasən, SOCAR Balakəndə növbəti "ABAD" mərkəzinin yaradılmasına və 12 ailənin zəruri istehsal avadanlıqları, o cümlədən istehsal konteynerləri ilə təmin olunmasına dəstək göstərəcəkdir.

Qeyd edək ki, Azərbaycan Respublikası Prezidentinin 23 sentyabr 2016-cı il 1047 nömrəli Fərmanına əsasən Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyində "ABAD" (Ailə Biznesinə Asan Dəstək) publik hüquqi şəxs yaradılıb. "ABAD"ın yaradılmasında məqsəd Azərbaycan Respublikasının sosial-iqtisadi inkişafında vətəndaşların fəal iştirakına, kiçik və orta sahibkarlığın inkişafını, əhalinin məşğulluq səviyyəsinin artırılmasını və rəqabətqabiliyyətli ailə təsərrüfatlarının formalaşdırılmasını dəstəkləmək üçün sosialyönümlü layihələrin həyata keçirilməsidir.

Zərif Nisə

Milli.Az

Digər maraqlı xəbərlər Milli.Az-ın Facebook səhifəsində
 












Xəbərin orijinal ünvanı: http://news.milli.az/country/527490.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR