Missuri Universitetinin tədqiqatçıları tərəfindən hazırlanan yeni texnologiya evlərdə yaşlı insanların vəziyyətini izləməklə təhlükəli yıxılmaların qarşısını alacaq.
Publika.az xəbər verir ki, yeni sistem ahıl
insanların bədənində hər hansı qurğunun yerləşdirilməsini tələb
etmir. Monitorinq sistemi yaşlı insanın yerişini vizual
qiymətləndirən ötürücülər dəstindən istifadə edir. Sistem təhlükəli
nəticələrin qarşısını almaq üçün yerişin sürətini, hərəkətdəki
dəyişiklikləri və addımın uzunluğunu ölçür.
Tədqiqatlara görə, ahıl insanın yerişi saniyədə 5 sm yubandıqda
növbəti üç həftə ərzində yıxılma ehtimalı 86,3 faiz təşkil edir.
Tədqiqatdan, həmçinin məlum olub ki, addımın uzunluğu qısa olduqda
bu, növbəti həftədə yıxılma ehtimalını 50,6 faizə çatdırır.
Yeni sistemin tədqiqi və sınaqları Missuri Qocalar Evində
keçirilib. Qocaların hərəkətində dəyişiklikləri qeydə alan sistem
sonradan insidentin şəklini avtomatik çəkərək tibb bacılarını
xəbərdar edib. Nəticədə monitorinq sistemi qocaların vəziyyətindəki
dəyişikliklərə vaxtında diqqət yetirməyə imkan verib.
Dəyişiklikləri aşkar edən mütəxəssislər onlara hərəkət aktivliyini
bərpa etməyə kömək etmək üçün müdaxilə edə və ya yerimə zamanı
dəyişikliklərə səbəb olan xəstəliklərə diqqət yetirə
biləcəklər.