Avropa Klublar Assosiasiyası (ECA) "Neftçi" ilə bağlı qərar qəbul edib. Fanat.Az-ın əldə etdiyi məlumata görə, Bakı klubu tam hüquqlu üzvülükdən məhrum edilərək müşahidəçi statusu verilib (səs vermə hüququ olmayan).
Bu barədə qərar ECA-nın ötən ilin sentyabrında Cenevrədə baş tutan Baş Assambleyasında qəbul edilib. Lakin bu günə qədər "Neftçi" bu barədə ictimaiyyətə məlumat verməyib.
Əvəzində "Qarabağ" təşkilatın tam hüquqlu üzvü statusu alıb. Buna səbəb "Neftçi"nin son illərdə uğursuz çıxışı, "Qarabağ"ın isə əksinə beynəlxalq arenada özünü yaxşı tərəfdən göstərməsi olub. Ağdam klubu təşkilatın ən gənc üzvlərindən olsa da, qısa zamanda tam hüquqlu üzv statusu ala bilib.
ECA-nın Cenevrə toplantısında "Xəzər Lənkəran" və "Bakı" üzvlükdən çıxarılıb. Buna səbəb hər iki klubun fəaliyyətini dayandırması olub. Azərbaycandan təşkilatın üzvü olan digər klub AZAL-dı.
Fanat.Az
