Martın 30-da "Azərbaycan Dəmir Yolları" QSC-də "Ukrayna Dəmir Yolu" SC-nin İdarə Heyətinin sədri Balçun Voytsexin başçılıq etdiyi nümayəndə heyəti ilə görüş keçirilib.
"Azərbaycan Dəmir Yolları" QSC-dən Milli.Az-a verilən məlumata görə, görüşdə "Azərbaycan Dəmir Yolları" QSC-nin sədri Cavid Qurbanov çıxış edərək dəmir yolunda həyata keçirilən islahatlar, ölkənin tranzit potensialının artırılması istiqamətində görülən işlər və qarşıda duran vəzifələr haqqında ətraflı məlumat verib.
O bildirib ki, Azərbaycan prezidenti İlham Əliyevin 7 dekabr 2015-ci ildə "Şimal-Cənub Beynəlxalq Nəqliyyat Dəhlizinin Azərbaycan Respublikasının ərazisindən keçən hissəsində işlərin sürətləndirilməsi haqqında" imzaladığı Sərəncama uyğun olaraq, artıq Astara stansiyasından İran İslam Respublikası dövlət sərhəddinə qədər birxətli 8,3 km dəmir yolunun çəkilişi və Astara çayı üzərindəki dəmir yolu körpüsünün tikintisi yekunlaşıb. Bu günlərdə isə sınaq qatarı sərhədi yeni tikilmiş körpü vasitəsilə keçib.
Hazırda Astarada (İran) aparılan işlərin tərkibinə 35 hektar ərazidə dəmir yolu stansiyasının tikintisi və yüklərin boşaldılması üçün terminalın inşası daxildir.
C.Qurbanov bildirib ki, Şimal-Cənub Nəqliyyat Dəhlizi əsasən Hindistandan və İran Körfəzi regionundan, yüklərin Rusiya, Qərbi Avropa, Baltikyanı və Skandinaviya ölkələrinə çatdırılmasına hesablanıb. Şimal-Cənub Tranzit Dəhlizinin digər marşrutlarla müqayisədə əsas üstünlüyü isə tranzit məsafəsinin və tranzit vaxtının iki-üç dəfə az olmasıdır.
Cəmiyyətin sədri Cənub-Qərb Nəqliyyat Dəhlizindən də söz açıb. Onun sözlərinə görə, Dəhliz Avropa Birliyi ilə Hindistan arasında yüklərin daşınmasına hesablanıb. Cənub-Qərb Nəqliyyat Dəhlizi İran, Azərbaycan, Gürcüstan, Ukrayna vasitəsilə Hindistandan Avropaya və əks istiqamətdə yüklərin daşınmasında vaxt itkisini azaldır. İkin hesablamalara əsasən, bu dəhliz üzrə yük daşımalarını həftədə 7 gün ərzində həyata keçirmək mümkün olacaqdır.
QSC sədri son vaxtlar digər marşrutlarla yanaşı, Beynəlxalq Transxəzər Nəqliyyat Marşrutunun gücləndirilməsi istiqamətində görülən işlərin də olduqca təqdirəlayiq olmasını xüsusi vurğulayıb.
Daha sonra Azərbaycan və Ukrayna dəmiryolçuları arasında ikitərəfli əməkdaşlığın inkişafı məsələləri müzakirə olunub. "Ukrayna Dəmir Yolu" SC-nin İdarə Heyətinin sədri Balçun Voytsex Azərbaycanla ikitərəfli əməkdaşlığın daha da genişləndirilməsində, iki ölkə arasında ticarət dövriyyəsininin artırılması üçün Beynəlxalq Transxəzər Nəqliyyat Marşrutunun imkanlarından istifadə etməkdə maraqlı olduqlarını bildirib.
Sonra qonaqlar Bakı dəmir yolu ağzalına gələrək yenidənqurmadan sonra yaradılan şəraitlə tanış olublar. Görüşün sonunda Azərbaycan və Ukrayna dəmiryolçuları arasında niyyət protokolu imzalanıb.
Yusif Nəsirli
Milli.Az
Digər maraqlı xəbərlər Milli.Az-ın Facebook səhifəsində
