UEFA Millətlər Liqası üçün liqaların ilkin tərkibini açıqlayıb.
Publika.az xəbər verir ki, 55 üzv assosiasiya 4 Liqaya bölünüb. Avropa futbol qurumu 2018-ci il dünya çempionatının seçmə qrup mərhələsində V turun oyunları başa çatdıqdan sonra ölkələrin yeni reytinq siyahısını dərc edib. Əmsallar cədvəli əsasında tərtib olunmuş həmin siyahıya əsasən, Azərbaycan millisi C Liqasına düşüb. Bu, yığmanın hazırda 26-cı pillədə yer alması ilə əlaqədardır.
A və B liqalarına hərəyə 12, C Liqasına 15, D Liqasına isə 16 komanda düşüb. Liqaların yekun tərkibi DÇ-2018-in təsnifat mərhələsi yekunlaşdıqdan sonra - 2017-ci il noyabrın 15-də açıqlanacaq. Həmin vaxtadək Azərbaycan UEFA reytinqində ən azı 2 pillə yüksəlsə, B Liqasına düşəcək. Bunun üçün DÇ-2018-in seçmə qrup mərhələsindəki qalan 5 oyunda yüksək nəticələr göstərmək lazımdır. Liqaların hazırkı tərkibi isə belədir:
A Liqası (hər biri 3 komandadan ibarət 4 qrup): Almaniya, Fransa, Portuqaliya, Belçika, İspaniya, İngiltərə, İsveçrə, İtaliya, Xorvatiya, Polşa, İslandiya, Bosniya və Herseqovina
B Liqası (hər biri 3 komandadan ibarət 4 qrup): İrlandiya, Rusiya, Avstriya, İsveç, Slovakiya, Uels, Ukrayna, Hollandiya, Şimali İrlandiya, Çexiya, Türkiyə, Macarıstan
C Liqası (3 komandadan ibarət 1, 4 komandadan ibarət 3 qrup):
Yunanıstan, Rumıniya, Sloveniya, İsrail, Serbiya, Danimarka, Bolqarıstan, Albaniya, Şotlandiya, Monteneqro, Norveç, Litva, AZƏRBAYCAN, Kipr, Ermənistan
D Liqası (hər biri 4 komandadan ibarət 4 qrup): Estoniya, Finlandiya, Belarus, Gürcüstan, Farer adaları, Latviya, Makedoniya, Qazaxıstan, Moldova, Lüksemburq, Lixtenşteyn, Kosovo, Malta, Andorra, San Marino, Cəbəllütariq
UEFA İcraiyyə Komitəsinin hazırda qüvvədə olan qərarına əsasən, Azərbaycan və Ermənistan, eləcə də Rusiya və Ukrayna eyni qrupa düşə bilməzlər.
Millətlər Liqasında eniş və yüksəliş prinsipləri tətbiq olunacaq. Qalib 2019-cu ildən başlayaraq, hər bir tək ildə müəyyənləşəcək. Bu turnir bir çox beynəlxalq yoldaşlıq görüşünü əvəzləyəcək. Komandalar yuxarı qrupa vəsiqə və ya Millətlər Liqasında çempionluq titulunun saxlanılması, habelə, 2020-ci il Avropa çempionatının "pley-off" matçlarına vəsiqə uğrunda mübarizə aparacaqlar. Millətlər Liqasında mübarizəyə 2018-ci ilin sentyabrında start veriləcək. Oyunlar sentyabr, oktyabr və noyabr aylarında keçiriləcək. Final turniri isə 2019-cu ilin iyununa təsadüf edəcək.
Millətlər Liqasında göstərilmiş nəticələr əsasında 2020-ci il Avropa çempionatına 4 vəsiqə sahibini tapacaq. Onlar arasında 2020-ci ilin martında "Dördlər finalı" keçiriləcək.
Qeyd edək ki, 2020-ci il Avropa çempionatının final mərhələsinin oyunları 13 şəhərdə, o cümlədən, Bakıda olacaq. (sportnet.az)
