Ötən gün Türk kinosunun əfsanəsi Halit Akçatepe Türkiyə vaxtı ilə saat 14.40-da dünyasını dəyişib.
Milli.Az "gazetevatan"a istinadla bildirir ki, onun ölüm səbəbi ilə bağlı xəstəxanadan ilk açıqlama gəlib.
Xəstəxanadan bildirilib ki, uzun müddətdir müalicə alan 79 yaşlı aktyor infarkt keçirdiyinə görə vəfat edib.
"Son iki ildir evdə müalicə alırdı. Anidən evdə halı pisləşdiyinə görə, tibb bacısı ambulans çağırıb. O, xəstəxanaya çatdırılanda artıq nəbzi zəifləmişdi. Təxminən 45 dəqiqə ona müdaxilə edilsə də, 14:40-da həyatını itirdi".
Halit Akçatepe "Hababam Sınıfı" komediya filmindəki "Güdük Necmi" obrazı ilə insanların sevgisini qazanıb.
Onun ölümü çoxlarını yasa boğub. Türkiyənin bütün məşhurları onun ölümü ilə bağlı kədərli olduqlarını sosial şəbəkədə dilə gətiriblər.
Bütün bunlar onun 2014-cü ildə dediyi sözü ağıla gətirib. Belə ki, o, üç il öncə jurnalistlərin "nə qədər sevilirsiniz?" sualına, "nə qədər sevildiyimi yasımda görəcəksiniz", - deyə cavab vermişdi.
Bəxtiyar Umarlı
Milli.Az
