“Maraqlı oyun keçdi. İlk hissədəki tempi qoruyub saxlaya bilmədik. Planımız o idi ki, ikinci hissədə 15-20 dəqiqə hesabı qoruyub saxlayaq. Gəlin etiraf edək ki, “Qarabağ” bizdən üstün idi”. Bu sözləri “Kəpəz”in baş məşqçisi Şahin Diniyev deyib.
Azərbaycan Premyer Liqasının XIV turunda səfərdə “Qarabağ”la qarşılaşan gəncəlilər 1:2 hesablı məğlubiyyətə üzülüblər.
Oyundan sonra fikirlərini bölüşən çalışdırıcı matçı dəyərləndirib: “Futbolçularıma təşəkkür edirəm. Başabaş olmasa da, buna yaxın futbol oynadıq. Bu gün qalib gəlmək istəyirdik. Əvvəllər “Qarabağ”a böyük hesabla uduzmamaq üçün oynayırdıq. İndi isə uduzsaq da, futbol oynadıq. Qarşıdakı 4 oyundan qalib ayrılmaq istəyirik. Rəqibi təbrik edirəm”.
- Tadas da Davudun bu gün buraxdığı kimi səhvdən sonra ehtiyata göndərilmişdi...
- Tadasda bir yox, bir neçə belə səhv olmuşdu. Bir oyuna görə futbolçunu ehtiyata göndərməzlər. Düzdü, qolda Davud Kəriminin səhvi oldu. Ancaq bu, kobud səhv deyildi.
- Bundan sonra komandanın əsas məqsədi nədi?
- Sonadək mübarizə aparacağıq. 3 oyunu evdə keçirəcəyik. Avrokubok ümidimiz davam edir. Komanda bu gün göstərdi ki, yaxşı ot örtüyündə daha yaxşı oynayır. (Apasport.az)
Fanat.Az
