“Ermənistanda keçirilən parlament seçkilərindən sonra
ölkədə siyasi sarsıntılar gözləniləndir”.
Publika.az xəbər verir ki, bu barədə ABŞ Mərkəzi Kəşfiyyat
İdarəsinin (CİA) “kölgəsi” hesab olunan “Stratfor” beyin mərkəzinin
hazırladığı məqalədə deyilir.
Mərkəz yazır ki, bu parlament seçkiləri təkcə Ermənistan üçün yox,
Rusiya üçün də əhəmiyyətlidir: “Seçkidən sonra kimin qələbə
qazanacağının Moskva üçün o qədər də əhəmiyyəti yoxdur, çünki
ruslar bütün tərəflərlə işləyir. Buna görə də seçkidən sonra
parlament üsul-idarəsinə keçən Ermənistanda xarici siyasət kursu
dəyişməyəcək.
Lakin nəticələr Rusiya üçün ikiqat qələbənin olacağını göstərir. Çünki hakim partiyanın qələbəsi baş nazir Karen Karapetyanın mövqelərinin güclənməsi deməkdir. Hazırda Karapetyan Sarkisyan hakimiyyətində ən nüfuzlu şəxs hesab oluna bilər. Onun sadə ermənilər üzərində də təsir imkanları genişlənir. Karapetyanın Rusiya ilə birbaşa əlaqələri var. Kreml ümid edir ki, İrəvanda gələcək rejim onun Azərbaycana silah satmasına, həmçinin, Dağlıq Qarabağ münaqişəsində tutduğu mövqeyə görə susacaq.
Eyni zamanda, Moskva İrəvanda təsir dairəsini gücləndirmək üçün
Sarkisyanın aparatında müxtəlif gücləri ələ alır. İnformasiyalar
var ki, xarici işlər naziri Edvard Nalbandyan Rusiya ilə ailə
əlaqələrinə malikdir. Lakin Moskva üçün yeni müdafiə naziri Viqen
Sarkisyan əlverişli görünmür. Çünki o, Dağlıq Qarabağ məsələsində
Ermənistan siyasətini tətbiq edir və Kremlin Ermənistan daxilindəki
hansısa adamının danışıqlara rəhbərlik etməsinə imkan verməyi
düşünmür”.
“Stratfor” yayılmış məlumatlara istinadən qeyd edir ki,
Ermənistanın Müdafiə Nazirliyi Xarici İşlər Nazirliyinin bəzi
ənənəvi funksiyalarını öz üzərinə götürüb.
“Seçkidən sonra da Rusiya Ermənistan siyasətinə təsir
strategiyasını davam etdirəcək. Sarkisyanın Dağlıq Qarabağla bağlı
onun çağırışına qarşı çıxmasından dərs çıxaran Kreml Ermənistan
siyasətinin bütün tərəflərində müttəfiqlərinin olmasının
əhəmiyyətini anlayır. Rusiya bununla ehtiyac olduğu halda
Ermənistan liderlərinə təzyiq göstərəcək”, - deyə mərkəzin
məqaləsində vurğulanır.
Asif