Hacıqabul rayonunda evə basqın edən dəstə üzvləri saxlanılıb.
Milli.Az APA-ya istinadən xəbər verir ki, Hacıqabul və Salyan Rayon Polis Şöbələrinin əməkdaşlarının birgə keçirdikləri əməliyyat-axtarış tədbirləri nəticəsində fevralın 13-də Hacıqabul rayonunun Qubalı kənd sakini Tağıyev Kazım Fazil oğlunun yaşadığı evə oğurluq məqsədilə daxil olaraq quldurluq edən şəxslər tutulub.
Quldur basqınını həyata keçirən şəxslərin Salyan rayonunun Ərəbqardaşbəyli kənd sakini, 1992-ci il təvəllüdlü Elxan Maarif oğlu Kərimov, Kürdəmir rayon sakini, 1993-cü il təvəllüdlü Rəvan Yengibar oğlu Qasımov, Bakı şəhər sakini, 1994-cü il təvəllüdlü əvvəllər məhkum olunmuş Cavidan Elxan oğlu Bağırlı, Hacıqabul rayonunun Udulu kənd sakini, 1981-ci il təvəllüdlü, əvvəllər məhkum olunmuş Niyaməddin Dostəli oğlu Eminov və Sabirabad rayonunun Güdəcühür kənd sakini, 1986-cı il təvəllüdlü Elçin Nadir oğlu Əkbərov olduğu müəyyən edilib.
İstintaq müəyyən edib ki, evinə quldur basqını edilən Kazım Tağıyevin qonşusu Niyaməddin Eminov dəstəyə başçılıq edərək onun evində 80 min manat pulun olduğunu dəstə üzvlərinə xəbər verib. Daha sonra onun təklifi əsasında pulun quldurluq yolu ilə ələ keçirilməsini təşkil edib.
Həmin şəxslər fevralın 13-də maska taxaraq gecə saat 02:40 radələrində Kazım Tağıyevin yaşadığı evə daxil olub, onun əl-qolunu və ağzını yapışqan lentlə bağladıqdan sonra mənzildə olan 13050 manat pulu, 2 blok siqareti və 1 ədəd mobil telefonu ələ keçirərək oranı tərk ediblər.
Dəstə üzvlərinin digər cinayətlərdə də iştirakının olub-olmadığı istintaq tərəfindən araşdırılır.
Faktla bağlı cinayət işi başlanıb, araşdırma aparılır.
Milli.Az
Digər maraqlı xəbərlər Milli.Az-ın Facebook səhifəsində
