Suriyada “Fərat qalxanı” əməliyyatını başa çatdıran
Türkiyə ordusu yeni hücuma hazırlaşır.
Publika.az xəbər verir ki, Türkiyə prezidenti
Rəcəb Tayyip Ərdoğanın “Fərat qalxanı əməliyyatının birinci etapı
başa çatdı, davamı olacaq” deməsi də bunu təsdiqləyir.
Yeni hədəf haradır?
Məlumatlara görə, Türkiyə Silahlı Qüvvələri hər cür hücuma hazır
vəziyyətdədir. Lakin hücumun hara olacağı hazırda dəqiq deyil.
Hərbi mütəxəssislərə görə, Suriyada ABŞ və Rusiya ilə razılaşmadan
Menbiç, Afrin və Kobani bölgələrinə təktərəfli əməliyyat keçirmək
çətindir. ABŞ Rakka əməliyyatında YPG (PKK-nın Suriya qolu olan
PYD-nin silahlı qanadı) güclərindən istifadə edəcəyi üçün türk
əsgərlərinin bu əməliyyatda iştirakı mümkün deyil.
Ehtimallara görə, yeni hədəf Sincardır. Ötən həftə Türkiyənin
xarici işlər naziri Mövlud Çavuşoğlu da NATO toplantısı öncəsi
jurnalistlərə verdiyi açıqlamasında bildirdi ki, ABŞın Dövlət
katibi Reks Tillersonla müzakirələrdə Sincara birgə əməliyyat
məsələsi gündəmə gəlib.
“Lazım olarsa, Sincara hərbi müdaxilə edəcəyik. Orada PKK var və
Qəndil necədirsə, Sincar da elədir. ABŞ da Sincar da daxil olmaqla
PKK-nın hər yerdən çəkilməsini tələb etdi və Türkiyə ilə birlikdə
hərəkət edəcəklərini açıqladı”, - deyə o bildirib.
Sincar PKK üçün niyə önəmlidir?
PKK-nın “yeni Qəndil” etmək istədiyi İraqın Sincar bölgəsi
Türkiyənin Silopi vilayətinin təxminən 100 kilometr cənubunda
yerləşir. PKK-nın Sincara xüsusi önəm verməsi təsadüfi deyil:
- Türkiyə-Suriya-İraq sərhədlərində strateji əhəmiyyətə
malikdir.
- Ərazi dağlıqdır və terrorçular üçün sərfəlidir.
- Təhlükəsizlik baxımından Qəndil qədər olmasa da, PKK üçün önəmli
məkandır.
- Bölgədə etnik və dini müxtəliflik var.
- PKK-nın yeni adam toplaması üçün potensial qaynaq hesab
olunur.
- Qəndilə getməyə qorxan bəzi şəxslər buranı daha yaxın hesab
edirlər. Bunun səbəbi də Sincara getməyin daha asan olduğu və
istəmədiyi halda PKK-dan daha rahat qaça bilmək imkanının
olmasıdır.
- Türkiyənin təsir dairəsindən kənardadır. Bölgədə ABŞ-ın dəstəyi
ilə PKK-nın müdafiə nöqtələri inşa edilib.
- ABŞ-ın dizayn etdiyi təlim düşərgələri də buradadır. Buna görə də
Türkiyə bölgəyə hava əməliyyatları keçirmək istəyərkən, mütləq
ABŞ-la razılaşdırmalıdır.
Asif