Azərbaycanla İsveçrə arasında yüksək səviyyəli, intensiv siyasi və iqtisadi münasibətlər mövcuddur.
Milli.Az bildirir ki, bunu Trend-ə İsveçrənin Azərbaycandakı səfiri Filip Stalder deyib.
Səfir bildirib ki, Azərbaycanla İsveçrə diplomatik əlaqələrin qurulmasının 25 illiyini qeyd edir: "Biz çox şadıq ki, Azərbaycan Prezidenti İlham Əliyev Davosda Dünya İqtisadi Forumunda iştirak etmək üçün müntəzəm olaraq İsveçrəyə səfər edir və hər iki ölkə prezidentlərinin müntəzəm görüşü keçirilir".
F.Stalder əlavə edib ki, iki ölkə mədəniyyət sahəsində də sıx əməkdaşlıq edir: "Səfirlik olaraq biz Azərbaycanla İsveçrə arasında bütün sahələrdə, o cümlədən siyasi, iqtisadi, mədəniyyət, təhsil sahələrində əməkdaşlığı inkişaf etdirməyə çalışırıq".
İnvestisiyalar haqqında danışan səfir bildirib ki, İsveçrə şirkətləri Azərbaycanda aktiv fəaliyyət göstərirlər, həmçinin bir neçə İsveçrə şirkəti Sumqayıt Kimya Sənaye Parkına investisiya qoyub.
Milli.Az
