20 ildən çox müddətdə informasiya təhlükəsizliyi sahəsində tədqiqatlar dərc edən "IBM X-Force" laboratoriyası boşluqlar haqda yeni hesabatını təqdim edib. Məlum olub ki, boşluqların sayı rekord səviyyədədir və hakerlər ən uğurlu maliyyə yönümlü zərərverici proqramların imkanlarını genişləndirərək onları beynəlxalq səviyyədə tətbiq edirlər.
"IBM" şirkətinin mütəxəssisləri 2016-cı ilin nəticəsinə görə, müxtəlif proqram məhsullarında 10197 boşluq qeydə alıblar. Bu göstərici şirkətin tarixində ilk dəfə 10 mini ötüb.
Milli.Az ICTnews-a istinadən bildirir ki, ABŞ şirkətinin məlumatına görə, məlumat itkisi nəticəsində şirkətlər və istifadəçilər 2016-cı ildə ümumilikdə 4 milyarddan çox məlumat itiriblər ki, bu da ötən ilin göstəricisindən 566% daha çoxdur. Şirkət rəsmisi bildirib ki, məlumat sızmasının nəticələri acınacaqlı ola bilər.
"IBM X-Force" laboratoriyasının mütəxəssisləri aşkar ediblər ki, kiberfırıldaqçılar lokal cinayətkar təşkilatlarla şəbəkə və əməkdaşlıqlar yaradaraq yeni regionlarda öz fəaliyyətini genişləndiriblər. Bunun nəticəsi kimi onlar elektron poçt göndərmələri siyahısına, bank eyniləşdirmə məlumatları və pulların yuyulması üçün regional əməliyyatlara giriş əldə ediblər.
"IBM X-Force"nin mütəxəssisləri bildiriblər ki, 2016-cı ildə maliyyə xidmətləri sahəsi kiberhücumların sayı üzrə lider sahə olub, halbuki 1 il əvvəl sözügedən reytinqdə üçüncü yeri tutmuşdu.
Milli.Az
Digər maraqlı xəbərlər Milli.Az-ın Facebook səhifəsində
