"Birgə və Sağlam" ictimayi birliyinin ve "Ümid var" xeyriyyə cəmiyyətinin təşkilatçılığı ilə aprel ayının 24-də saat 18:00-da Boulevard Hoteldə autizm sindromlu uşaqların iştirakı ilə moda nümayişi baş tutacaq.
"Autizm- Fərqli və Bizdən Biri" adlanan moda nümayişində Azərbaycanda ikinci dəfə podiuma autizmli uşaqlar çıxacaq. Hər zaman böyük qayğıya ehtiyacı olan bu uşaqlar üçün tanınmış modelyer Gülnarə Xəlilova xüsusi kolleksiya hazırlayıb. Gülnarə xanımın yüksək zövq və sevgiylə, milli üslubda hazırladığı geyimləri podiumda 10 autizmli model təqdim edəcək. Kolleksiyanı "Birgə və Sağlam" ictimai birliyinin reabilitasiya mərkəzinin uşaqları nümayiş etdirəcək. Uşaqları podiuma "Sevimli Bala" uşaq kulubunun tərkibində fəaliyyət göstərən Kiddoz Model Agentliyi hazırlayıb.
Tədbir həm də maarifləndirici xarakter daşıyır. Məlumat üçün bildirək ki, aprel ayı Birləşmiş Millətlər Təşkilatı tərəfindən 2007-ci ildən etibarən Ümumdünya Autizm Maarifləndirilməsi ayı kimi qeyd edilir. Bu səbəbdən də tədbir boyu qonaqların "Autizm nədir?" sualına cavab tapması üçün müxtəlif qısametrajlı filmlər göstəriləcək, autizmi anladan bukletlər paylanacaq. Ətrafındakı insanlardan anlayış, sevgi, qayğı gözləyən bu uşaqların cəmiyyətə inteqrasiyası baxımından da tədbir mühüm əhəmiyyət kəsb edir. Çox maraqlı proqramla təqdim olunacaq moda nümayişinə əməkdar artist Tünzalə Ağayeva "O səs Azərbaycan" komandası ilə dəstək olacaq. Tünzalə xanım musiqisi ona, sözləri Murad Arifə məxsus autizmli uşaqlara həsr etdikləri "Fərqliyəm" mahnısını ifa edəcəklər. Tədbirdə bir sıra sənətçilər də iştirak edəcək.
Qeyd edək ki, Moda nümayişindən əldə olunan vəsait "Birgə və Sağlam" ictimayi birliyinin reabilitasiya mərkəzinin imkansız ailələrin autizmli uşaqlarının reabilitasiyasına sərf olunacaq.
İnformasiya dəstəyi - Trend.az, Day.Az, Milli.Az, Azernews.az
