Türkiyə prezidenti Rəcəb Tayyib Ərdoğan Ankaradakı son çıxışında Türkiyə və Avropa İttifaqı arasındakı danışıqların dayandırılması və edam cəzasının bərpası haqqında referendum keçirilməsi variantını istisna etməyib.
Metbuat.az-ın məlumatına görə, Avropa Parlamentinin prezidenti Antonio Tayani Ərdoğanın fikirlərinə münasibət bildirib. O, edam cəzasının bərpasının Türkiyəni bir neçə il geriyə atacağını qeyd edib:
"Edam cəzasının bərpa edilməsi Türkiyəni geri salacaq. Yenidən 2004-cü ilə qayıdacaqlar. Bu, edam cəzasını tətbiq etməyən tək qitə olan Avropanın qırmızı xəttidir".
Tayani Avropa İttifaqı ilə danışıqların dayandırılması mövzusuna da toxunub:
"Dialoq Türkiyənin də xeyrinədir. Bizi birləşdirən ticarət anlaşmalarımızı düşünmək belə, yetərlidir. Danışıqlardan imtina edə bilmərik. Ən azından, məcburi köçkünlərlə bağlı məsələlərdəki və terrorizmlə mübarizədəki əməkdaşlığımız nəzərə alınmalıdır".
