Prezident İlham Əliyevin iştirakı ilə Yevlaxda keçirilən qeyri-neft ixracatçılarının respublika müşavirəsinin böyük əhəmiyyəti var.
Milli.Az bildirir ki, bu barədə Trend-ə açıqlamasında millət vəkili Elman Nəsirov deyib.
Onun sözlərinə görə, bu müşavirədən sonra Azərbaycanda qeyri-neft sektorunun inkişafı üçün imkanlar daha da artacaq:
"Bu həm də ixracatı artıracaq. Qeyri-neft məhsullarının dünya bazarına "Made in Azerbaijan" brendi kimi çıxarılması prioritet məsələlərdəndir. Artıq "Made in Azerbaijan" brendi dünyada geniş şəkildə yayılmaqdadır. Bu istiqamətdə atılan addımlar yüksək nəticə verir. Bu ilin birinci rübü ərzində ixracat 50 faiz artıb. Bu o deməkdir ki, bu sahədə aparılan siyasət öz nəticələrini verməyə başlayıb. Müşavirədə iştirak edən sahibkarlar Prezidentin çıxışı, mövqeyindən sonra artıq özlərinə bir daha dəstək qazandılar və bundan sonra da onlar istehsalın artırılması üçün dövlət tərəfindən bütün dəstəyin göstəriləcəyinə əmin oldular. Bu müşavirədən sonra qeyri-neft sektorunda fəaliyyət göstərən sahibkarlara dövlət tərəfindən böyük dəstək veriləcək və bu işlərin aparılması birbaşa dövlət başçısının nəzarətindədir. Hazırda ümumi daxili məhsulda qeyri-neft sektorunun həcmi artmağa başlayıb, idxaldan asılılıq azalmaqdadır. Bu gün ümumi daxili məhsulda neft sektorunun payı cəmi 30 faizdir".
E.Nəsirov bildirib ki, Yevlaxda keçirilən bu müşavirə ilkdir və bundan sonra belə tədbirlər davamlı olacaq.
Milli.Az
