Ümid edirik ki, dövlət başçıları iyun ayında Astanada İranın Şanxay Əməkdaşlıq Təşkilatına (ŞƏT) tamhüquqlu üzvü kimi qoşulması imkanı haqqında məsələyə baxa biləcəklər.
Publika.az “RİA-Novosti” agentliyinə istinadən xəbər verir ki, bunu Rusiyanın Xarici İşlər Nazirliyinin başçısı Sergey Lavrov Astanada ŞƏT-in xarici işlər nazirləri şurasının iclasında deyib.
BMT Təhlükəsizlik Şurasının İrana qarşı tətbiq etdiyi sanksiyaların ləğvini xatırladan Lavrov bildirb ki, indi İranın ŞƏT-ə qoşulması üzvlük meyarlarına tamamilə uyğundur.
Görüş ŞƏT-in dövlət başçılarının iyun sammiti üçün son hazırlıq mərhələsi daşıyır.
Qeyd edək ki,ŞƏT 2001-ci il iyunun 15-də Şanxayda 5 ölkənin (Rusiya, Çin, Qazaxıstan, Özbəkistan, Tacikistan və Qırğızıstan) prezidentlərinin birgə görüşü zamanı yaradılmış, daimi əsaslarla fəaliyyət göstərən regional beynəlxalq birlikdir. Monqolustan, Hindistan, Pakistan, İran, Əfqanıstan və Belarus ŞƏT-də müşahidəçi, Şri-Lanka, Türkiyə, Azərbaycan, Ermənistan, Kamboca və Nepal isə dialoq üzrə tərəfdaş statusuna sahibdir.
2015-ci il iyulun 10-da ŞƏT-ə üzv dövlətlərinin başçıları Şurasının iclasında Azərbaycana ŞƏT-də dialoq üzrə tərəfdaş statusunun verilməsi barədə qərar qəbul edilib.
Ömər Dağlı