Avropa Şurası Parlament Assambleyasının (AŞPA) yaz sessiyasının iclasında qurumun sədri Pedro Aqramunt (İspaniya), AŞPA üzvləri Jordi Çukla (İspaniya) və Alen Desteksin (Belçika) Suriyaya səfəri ilə AŞPA-da açıq dinləmələr keçirilir.
APA-nın məlumatına görə, AŞPA sədri P. Aqramunt Suriyaya səfər etdiyi üçün bir daha üzr istəyib: "Mən Suriyaya ispaniyalı senator kimi getmişəm. Suriyada internet və telefonum işləmirdi, ona görə də həmkarlarımı çox gec məlumatlandıra bildim. Mətbuata isə heç vaxt açıqlamalar verməmişəm. Mən orada AŞPA təmsilçisi kimi səfərdə deyildim. Mən orda da dedim ki, Əsəd rejimini dəstəkləmirəm, onun hərəkətlərini pisləyirəm".
AŞPA sədri bu məsələdə Rusiya KİV-ni də günahlandırıb: "Bu məsələdə Rusiya KİV-in də günahı var. Onlar məsələni şişirdib manipulyasiya etməyə çalışıblar. Mən onları bu hərəkətlərinə görə qınayıram. Ordakı rus deputatlar öz mətbuatları ilə birlikdə bizi aldatdılar, bizimlə manipulyasiya etdilər. Buna görə bir daha üzr istəyirəm. Mən dünən də Büronun iclasında dedim ki, AŞPA sədri kimi vəzifəm bütün dövlətlərlə, o cümlədən Rusiya ilə yaxşı münasibətlər qurmaqdır. Amma onların mənim bu səfərimlə bağlı belə manipulyasiya etmələri, lazım gələrsə, mənim bu ölkəyə münasibətimi də dəyişə bilər".
O, Suriyaya səfəri barədə İspaniya Xarici İşlər Nazirliyinə məlumat verdiyini də qeyd edib: "Məlumat verdiyim şəxsi aprelin 27-də sessiyaya çağırtdıracağam, sizə düzünü desin. Mən artıq həm Assambleyanın, həm də öz reputasiyamın qorunması üçün üzr istəmişəm və bilirəm ki, bu səfəri etməməli idim".
P.Aqramunt bildirib ki, bəzi şəxslər bu səhər AŞPA-dakı kabinetinə girərək, ona aid kağızları və pullarını götürüblər: "Bu haqda həm Avropa Şurasının baş katibinə, həm də polisə məlumat vermişəm".
P.Aqramunt AŞPA sədri vəzifəsində qalıb-qalmayacağı ilə bağlı sessiyanın son günü - aprelin 28-də xüsusi bəyanatla çıxış edəcəyini də bildirib: "Bizim vaxtımız olmadı ki, bunun manipulyasiya olduğunu anlayaq. Mənim səfərimin və bütün bu görüşlərimin əsas məqsədi Avropaya da təsir edən bu müharibəyə son qoymağa yardımçı ola bilmək idi. Beşinci gün Büroda statusumla bağlı qəti qərar verəcəyəm".
J.Çukla isə qeyd edib ki, tələyə düşdüklərini çox gec anlayıblar: "Biz orda olanda çox gec başa düşdük ki, Suriya özü də, elə biz də tamamilə rusların tələsindəyik. Mən totalitar rejimləri qəbul etmirəm, onlara qarşı həmişə mübarizə aparmışam. Mən bir daha üzr istəyirəm və deməliyəm ki, sadəlöhvlük edib, bu səfəri qəbul etməklə vəziyyəti düzgün qiymətləndirməmişəm".
A.Desteks bildirib ki, yalnız sonradan bilib ki, heyətdəkilərdən yalnız 3-ü AŞPA üzvü olub: "Mən heç bilmirdim ki, 20 nəfərlik heyətdəkilərdən yalnız 3 nəfəri AŞPA üzvüdür. Bizimlə açıq-aydın manipulyasiya edildi. Mən bu səfəri belçikalı deputat kimi etmişəm, AŞPA təmsilçisi yox. Çünki Belçikada terror və Suriya çox həssas məsələdir. Belçikada baş verən terror aktlarının müəllifləri çoxu Suriyadan gəlib".
Bununla da, dinləmələr başa çatıb. Son qərar AŞPA bürosunun aprelin 28-də keçiriləcək iclasında veriləcək.
Qeyd edək ki, İspaniya kralı VI Filip aprelin 27-də AŞPA-ya səfər edəcək. Bu da nəzərə alınaraq ispaniyalı parlamentar P. Aqramuntun bu sessiya ərzində AŞPA sədri postunda qalmasına etiraz edilməyib.
Xatırladaq ki, P. Aqramunt Rusiya Dövlət Dumasının sədr müavini Vladimir Vasilyevin rəhbərlik etdiyi Rusiya nümayəndə heyəti ilə birlikdə bu ilin martında Suriyaya səfər edərək, bir sıra görüşlər keçirib, o cümlədən Suriya prezidenti Bəşər Əsədlə görüşüb.
