Azərbaycan millisinin hücumçusu Dəniz Yılmaz klubu "Bursaspor"da növbəti dəfə komandadan uzaqlaşdırılıb.
Milli.Az apasport.az-a istinadən xəbər verir ki, buna səbəb 29 yaşlı futbolçunun qeyri-stabil çıxışı göstərilib.
Superliqanın XXX turunda "Çaykur Rizəspor"a böyük hesabla (0:6) məğlub olan "ağ-yaşıllar"da Dəniz "18-liy"ə daxil edilməmişdi. Məlum olub ki, baş məşqçi Adnan Örnəkin raportu əsasında oyunçu qeyri-müəyyən müddətə komandadan qovulub.
Bununla Yılmaz cari mövsümdə ikinci dəfə eyni aqibətlə izləşir. Bir müddət əvvəl Sərcan Yıldırımla birlikdə heyətdən kənarlaşdırılan hücumçu 5 gündən sonra bağışlanılmışdı.
Qeyd edək ki, bu mövsüm ümumilikdə keçirdiyi 21 matçda 5 qola imza atan Dəniz Yılmazın "Bursaspor"la müqavilə müddəti 2019-cu ilin yayına qədərdi.
Milli.Az
