Azərbaycan Dövlət Gənc Tamaşaçılar Teatrının baş rejissoru, Azərbaycan və Kalmıkiya Respublikalarının əməkdar incəsənət xadimi Bəhram Osmanov növbəti dəfə Beynəlxalq rejissor laboratoriyasında iştirak edəcək.
Teatrın mətbuat xidmətindən Milli.Az-a verilən məlumata görə, Beynəlxalq laboratoriya Rusiya Federasiyası Teatr Xadimləri İttifqaının Milli teatrlar kabinetinin Rusiya Teatr Rejissorları Gildiyasının birgə təşkilatçılığı ilə cari ilin may ayının 26-dan - 31-dək Moskvada keçiriləcək.
M.Qorki adına Orenburq Dövlət Dram Teatrının bədii rəhbəri, xalq artisti, RF-in Teatr Xadimləri İttifaqının katibi Rifkat İsrafilovun rəhbərliyi ilə baş tutacaq laboratoriyanın bu dəfəki mövzusu "A.P.Çexovun "Üç bacı" pyesinin üzərində iş zamanı tətbiq edilən analiz metodu"dur.
Laboratoriya günlərində (29 may) Valeriy Fokinin sədrliyi ilə Teatr Rejissorları Gildiyasının II Assambleyası keçiriləcək. Assambleya görkəmli rejissor Yuri Lyubimovun anadan olmasının 100 illiyinə həsr olunacaq.
Dərslər RF-in Teatr Xadimləri İttifaqının binasında baş tutacaq.
B.Osmanov Assambleyanın yığıncağında "K.S.Stanislavskinin əməli təliminin ünsiyyət problemi" və "2009-2019-cu illər Azərbaycan teatrı - Beynəlxalq aləmdə: perspektivlər və araşdırmalar" mövzuları ilə çıxış edəcək, həmçinin "Üç bacı" pyesinin təhlili prosesində yaxından iştirak edəcək.
Milli.Az
