Ötən həftə Azərbaycan idman tarixinin parlaq səhifələrindən biri də yazıldı. Bakı şəhərində IV İslam Həmrəyliyi Oyunlarının açılış mərasimi oldu. 54 islam ölkəsinin idmançıları bir araya gəldi. Üzlər güldü, könüllər açıldı.
Açılış mərasiminə baxa-baxa düşünürdüm ki, deyəsən, davalı, barıt qoxulu dünyamızı oyunlar xilas edəcək. Oyun birləşməkdir. Oyun qovuşmaqdır. Oyun sülh prosesinin inkişafıdır.
Əllərdə bayraqlar, üzlərdə təbbəssümlər və Qarabağda güllə səsləri...
Mətin addımlar, qələbəyə inam hissi, əllər yuxarı qalxan sevinc fəvvarəsi və Suriyada dağılan evlər, axan qanlar, göydən tökülən bombalar...
Sevinc işıqları, 54 ölkənin həmrəyliyi, qardaşlığı, oyunları və şərq ölkələrində axıdılan qanlar, İŞİD, İraq və terrorlar...
Mənə elə gəlirdi ki, Bakının möhtəşəm idman sarayından dünyanın ağrıyan, göynəyən yaralarına məlhəm qoyulurdu. Güllələr susurdu. İslam Oyunlarının qarşısında müharibə oyunları gizlənirdi.
Yadıma gəlir, inişil Bakıda keçirilən 1-ci Avropa Oyunlarının açılışı zamanı sarayda oturduğum yerdə birdən-birə içimdən var səsimlə qışqırmaq nidası gəldi: “müharibəni dayandır, olimpiada!”. Elə o vaxt da, indi də şəhərimizdə keçirilən idman oyunları ürəyimizdəki müharibə çapıqlarını azacıq da olsa, sağaltdı.
İndi bu gün Bakıda 54 ölkənin idmançıları bir oyundadır, əsgərləri isə başqa bir oyunda. Burda bayraqlar bir-birinə söykənir, əlləri işıq şüası kimi göyə bir qalxır, orda əllər ayrıdır, orda bayraqlar bir-birinin üzünə baxmır.
İdman yarışları müharibənin bir növüdür. Amma silahsız, bombasız, terrorsuz bir növüdür. Bəlkə ölkələr aralarındakı siyasi anlaşmazlığı ordu ilə deyil, idman yarışları ilə həll eləsələr, dünyamız müharibəsiz, şirin-şirin nəfəs alar.
Və idman oyunları müharibə oyunlarına qalib gələr, alovları söndürər, hər idman növü səngərdən bir əsgər oğurlayıb öz sırasına qatar.
54 ölkənin idman həmrəyliyi kaş siyasi həmrəyliyə çevrilə biləydi və mənə elə gəlir ki, Bakıda keçirilən bu 4-cü İslam Həmrəyliyi Oyunları siyasi həmrəyliyə atılan ilk addımdır.
Bu Oyunlar bütün dünyaya göstərdi ki, islam dini sülh, azadlıq, bərabərlik sevən bir dindir.
İslamın düşmənləri tərəfindən atılan iftraların yalnışlığı hər kəsə bəlli oldu. Bakının oyunlara ev sahibliyi etməsi göstərdi ki, Azərbaycan tolerant ölkədir. Müharibəyə “yox” deyən, azadlığı, bərabərliyi təbliğ edən və verdiyi sözün arxasında mərdanə dayanan bir dövlətdir.
54 ölkənin İslam həmrəyliyi Qarabağda, Suriyada və başqa ölkələrdə müharibə ocaqlarını söndürə bilər. Açılış mərasimində idmançılar müxtəlif dillərdə danışsalar da, bayraqları müxtəlif rənglərdə olsa da, sevinclərinin, alqıışlarının, gülüşlərinin dini, dili birdir və bu alqış səsləri müharibə ocaqlarına bahar yağışı kimi yağdı.
Oyunların Bakıda keçirilməsi Azərbaycan dövlətinin mədəni, iqtisadi, siyasi gücüdür. Oyunlar vasitəsi ilə Azərbaycan öz mədəniyyətini, qədimliyini, ərazi bütövlüyünü, təmizliyini və birliyini bütün dünyaya inteqrasiya edir və bu oyunlar müharibə oyunlarını üstələyir.
