Bakı. 19 may. REPORT.AZ/ AFFA-nın 19 yaşadək futbolçular arasında təşkil etdiyi Azərbaycan çempionatına yekun vurulub. "Report"un məlumatına görə, XXXIII turda AZAL-la qarşılaşan və 7:0 hesabı ilə qələbə qazanan “Qarabağ” Liqanın qalibi olub.
Oyun başa çatdıqdan sonra qalib komandaya qızıl medallar və çempionluq kuboku təqdim edilib.
Mükafatları AFFA-nın baş katibi Elxan Məmmədov, İcraiyyə Komitəsinin üzvü Qurban Qurbanov və “Qarabağ” Futbol Klubunun vitse-prezidenti Tahir Gözəl təqdim ediblər.
Qeyd edək ki, “Qarabağ”ın U-19 komandası yeni mövsümdə Azərbaycanı UEFA Gənclər Liqasında təmsil edəcək. Komandanın baş məşqçisi Azərbaycan milli komandasının kapitanı Rəşad Sadıqovdur.
