Bakıda keçirilən IV İslam Həmrəyliyi Oyunlarının güləş yarışlarının son günündə 48, 53, 55, 58, 60, 63, 69 və 75 kq çəki dərəcələrində qadın güləşçilər arasında qaliblər müəyyənləşir.
Azərbaycan Güləş Federasiyasından Milli.Az-a verilən məlumata görə, Mariya Stadnik (48 kq) ilk görüşündə vaxtından əvvəl - 34 saniyə ərzində tam üstünlüklə Əlcəzairdən olan rəqibi Keyira Çairma Yahiaoi üzərində qələbə qazanıb. Təmsilçimiz növbəti görüşünü axşam saatlarında aparacaq. Final xarakterli qarşılaşmada Azərbaycan güləşçisinin rəqibi türkiyəli Evin Demirhan olacaq.
53 kq çəki dərəcəsində mübarizə aparan Leyla Qurbanova ardıcıl olaraq Türkiyə təmsilçisi Burcu Kevic və Qazaxstan təmsilçisi Aygül Nuralim üzərində tam üstünlüklə qələbə qazanıb. L.Qurbanova IV İslam Həmrəyliyi Oyunlarının qızıl medalını qazanıb.
55 kq çəkidə Natalya Sinişin yarışır. Onun çəkisində 4 idmançı var. İlk görüşündə güləşçimiz Qazaxstan təmsilçisinə tam üstünlüklə qalib gəlsə də, ardınca Nigeriya idmançısına uduzub. Güləşçimizin son rəqibi Türkiyə təmsilçisi Bediha Gün olacaq. Güləşçimizin hansı əyarlı medal qazanacağı son görüşlərin nəticəsinə əsasən müəyyənləşəcək.
Digər təmsilçimiz Alyona Kolesnik (58 kq) də ilk görüşünü qələbə ilə başa vurub. Final xarakterli son görüşdə güləşçimiz Qırğızıstan təmsilçisi Aysulu Tinibekova ilə qarşılaşacaq.
Tatyana Omelçenkonun (60 kq) mübarizə apardığı çəki dərəcəsində 3 idmançı iştirak edir. Birinci dövrəni qələbə ilə başa vuran Tatyana final xarakterli həlledici görüşdə kamerunlu Tiako Essombeyə qarşı çıxacaq.
Elmira Qəmbərova (63 kq) mübarizəyə yarımfinal mərhələsindən qoşulub. Bu çəkidə 6 güləşçi var. Yarımfinalda məğlub olan Elmira Kamerun təmsilçisi Etane Nqolle ilə bürünc medal uğrunda görüşə çıxacaq.
69 kq çəkidə mübarizə aparan Elis Manolova Kamerun və Türkiyə idmançılarını məğlub edərək finala yüksəlib. Həlledici görüşdə onun rəqibi Qazaxstan təmsilçisi olacaq.
Səbirə Əliyeva (75 kq) keçirdiyi 3 görüşdən ikisində tam üstünlüklə qalib gəlib, bir görüşdə uduzub. Final xarakterli son görüşdə güləşçimizin rəqibi Türkiyə təmsilçisi Yasemin Adar olacaq.
Qeyd edək ki, Bakı-2017 IV İslam Həmrəyliyi Oyunları mayın 22-dək davam edəcək. Yarışlar Azərbaycan paytaxtının 16 idman obyektində 21 idman növü üzrə keçirilir.
Milli.Az
