Yeraltı və yerüstü təbii sərvətlərlə zəngin olan Naxçıvan Muxtar Respublikası da görünüşü və dadı ilə seçilən meyvələri ilə fərqlənir. Bunlardan biri də yalnız Naxçıvanda yetişən göycədir.
Naxçıvan göycəsinin tanıdılması, brend məhsula çevrilməsi istiqamətində son illər ardıcıl işlər görülür. Bunlardan biri də ötən il keçirilən “Göycə festivalı” idi. Bu mənada sosial şəbəkələrdə aparılan təbliğati işləri xüsusi vurğulamaq lazımdır. Füysbuk və İnstaqram sosial şəbəkələrində “GoycəFest” adlı səhifə böyük maraqla qarşılanır. Hazırda 2 minə yaxın üzvü öz ətrafına toplayan bu səhifələrdə göycənin təbliğ olunması, müxtəlif kreativ yanaşmalarla göycə haqqında məlumatlar öz əksini tapıb.