Bakı sakinini küçədə bıçaqlayan şəxs yaxalanıb

Bakı sakinini küçədə bıçaqlayan şəxs yaxalanıb
13:55 23 May 2017
59 Ölkə
Ölkə mətbuatı
A- A+

Bakı. Samir Əli - Trend:

Mayın 21-də axşam saatlarında Xəzər rayonunun Qala qəsəbəsindəki "Stansiya" adı ilə tanınan ərazidə bıçaqlanma hadisəsi baş verib. Daxili İşlər Nazirliyindən Trend-ə verilən məlumata görə, ərazidə iki nəfər arasında mübahisə baş verib. Mübahisə əlbəyaxa davaya çevrilib və tərəflərdən biri digərinə bıçaq zərbəsi endirərək hadisə yerindən qaçıb.

Hadisə şahidlərindən biri dərhal ərazidə xidmət aparan polis əməkdaşlarına məlumat verib. Əlahiddə Çevik Polis Alayının əməkdaşları - polis serjantları Yavər Rəcəbov və İntiqam Manafov vaxt itirmədən hadisə yerinə gəlib yaralı Rövşən Ağayevi təcili xəstəxanaya göndəriblər.

Vətəndaşlardan alınan məlumat əsasında polislər hadisəni törədən şəxsin qaçdığı səmti dəqiqləşdirərək həmin istiqamətdə axtarış tədbirlərinə başlayıb. Axtarış nəticəsində polis hadisədə şübhəli bilinən Bakı şəhər sakini Zaur İsmayılovu saxlayıb. Z.İsmayılov hadisəni törətdiyini etiraf edib. Polis əməkdaşlarının iştirakı ilə cinayətin aləti olan bıçaq onun tulladığı yerdən tapılıb götürülüb və saxlanılan şəxs Xəzər Rayon Polis İdarəsinin 1-ci Polis Bölməsinə təhvil verilib.


Xəbərin orijinal ünvanı: http://az.trend.az/azerbaijan/incident/2758147.html

Şahid olduğunuz hadisələrin video və ya fotosunu çəkərək bizə göndərin:
0552252950 (Whatsapp)

BU KATEQORİYADAN DİGƏR XƏBƏRLƏR