Almaniyanın sədrliyi ilə Berlin şəhərində keçirilən Böyük İyirmiliyin (G20) Beyin Sammitində Böyük İyirmliyin liderləri üçün konkret təkliflər paketi hazırlayır və indiyədək hazırlanan təkliflərin hər biri müzakirə edilib.
Bu barədə Milli.Az-a açıqlamasında Sammitdə Azərbaycanı təmsil edən İqtisadi və Sosial İnkişaf Mərkəzinin (CESD) sədri, iqtisadçı-alim Vüqar Bayramov bildirib.
Onun sözlərinə görə, Sammitdə iqtisadiyyatın çox fərqli istiqamətləri ilə bağlı, o cümlədən inkluziv inkişaf, qlobal vergi sistemi və siyasəti, proteksionizm, qlobal maliyyə siyasəti, və stabilliyi, dayanıqlı inkişaf hədəfləri və hətta dinlərin inkişafda rolu kimi məsələlərə də toxunulub.
Azərbaycanlı tədqiqatçı müzakirələrdə çıxış edərək daha çox region və eləcə də bir sıra neftlə zəngin ölkələrdə yeni iqtisadi çağrışlar ilə bağlı məlumat verib: "Azərbaycan nümunəsində post-neft dövründə iqtisadiyyatın yeni neft qiymətlərinə transformasiyası ilə bağlı fiskal konsolidasiya və az volatilik islahatlar barədə fikirlərimi bölüşdüm. Çıxışlar zamanı gördüm ki, regiona maraq çox böyükdür. İştirakçılar Cənubi Qafqaz və Orta Asiya regionuna Rusiyanın maraqları sərhədində yerləşən, amma yüksək potensiala malik olan region kimi baxırlar. Sammitdə hazırlanan təkliflər bu il iyulun 7-8-də Hamburq şəhərində keçirilən Zirvə Görüşündə birbaşa dünya liderlərinə təqdim ediləcək".