Aktyor Ülvi Həsənlinin Milli.Az-a müsahibəsi.
- Ülvi, mətbuatda bir müddət öncə ölüm xəbəriniz yayılmışdı. Bu xəbərlər haradan qaynaqlanmışdı?
- Əslində sənət adamı bu tip xəbərlərə hazır olmalıdır. Mən sənətə gələndə bütün bunları gözə almışdım. Çəkilişlərdən birində səhhətim pisləşmişdi, çünki siz də bilirsiniz ki, bizim çəkilişlər çox gərgin və yorucu olur. Yəqin ki, ölüm xəbərimin yayılmasına səbəb səhhətimdə baş verən nasazlıq olub.
- Xarici görünüşünüz sizə problem yaratmır?
- Metrodan, avtobusdan istifadə etdiyim üçün mənə problem yaradır. Mərdəkandan Bakıya avtobusla gəlib gedirəm. Daha çox metroda reaksiya görürəm. Əslində bu bir tərəfdən yaxşıdır, amma digər bir tərəfdən mənə mane olur. Görürsən ki, metronun basabasında şəkil çəkdirmək istəyirlər. Bu kimi hallar tez-tez baş verir. Elə adam var ki, özündə kompleks edir, amma mən yox. Bəzən qəribə baxıb, söz atan da olur, amma mən onlara önəm vermirəm. Mənə bu cür saç çox xoşdur, əskinə qısa olanda mən sıxılıram.
- Saçlarınızın bu cür olması təklifi kimdən gəldi?
- O vaxtı Lider TV-də "Cavanlıq" serialı çəkilirdi. O zaman mənim saçlarım qıvrım idi. Bu stil məndə o vaxtdan qalmışdı, sadəcə indikindən fərqli olaraq saçım o vaxt çox az idi. "Dəfnə ağacı" serialında saçım çoxaldıqca burulurdu. Anar Heybətovun qızı Almaz mənə "kirpibaş" deyə müraciət edirdi. O vaxtdan "kirpibaş" adı hamının dilində əzbər oldu. "Dəfnə ağacı" serialı başlayanda Sənubər xanım da mənə bu cür deyərək müraciət edirdi. Elə o vaxtdan kirpilərin hüququnu qoruyuram (gülür). Mən əslində yeniliyi sevirəm, xoşlayıram ki, hər obrazda dəyişim. Serialda sırğa taxdım, saçımı boyadım. Halbuki Mərdəkanda yaşayan bir insanam. Bir dostum gəlib dedi ki, ayıbdır. Mən də cavabında ona dedim ki: "Ayıbı sən etmə, mən etməyim, bəs kim etsin?"
- Akademik Milli Dram Teatrına gəlişiniz necə oldu?
- İlk dəfə mən məktəb vaxtlarımdan teatrda çıxış etmişəm. Mərdəkan Xalq teatrında Rəhman Əlizadənin quruluşu ilə tamaşalarda oynamışam. İncəsənət universitetində oxuyarkən Estrada teatrında fəaliyyətimi davam etdirdim. Pərviz Məmmədrzayevin "Simsar" teatrında da işləmişəm. 4-cü kursda oxuyanda Nicat Kazımov bizim diplom tamaşamızda rəqslərə quruluş verirdi. O məni Gənc Tamaşaçılar Teatrına dəvət etsə də sonrada getmədim. Elə oldu ki, Vidadi Həsənovun "Azdrama"da açdığı teatr studiyasında fəaliyyətə başladım. Daha sonra Ramiz Novruz məni "Silindr" tamaşasına dəvət etdi. İlk böyük rolum bu tamaşada oldu. Ondan sonra digər tamaşalarda da əsas və köməkçi rollar oynamağa başladım. Hazırda teatr həyatımda bir az problemlər var.
- Nədir ki, problem? Olmaya gözləri götürmür sizi?
- Teatrda problemlərim çəkilişlərə görə yarandı. Mənə bir az qadağalar qoyuldu. O vaxtı "Dəfnə ağacı" serialından mənə təklif gəlmişdi. Teatrda isə yeni il tamaşası qurulurdu. Tamaşaya Bəsti xanım quruluş vermişdi. Elə oldu ki, tamaşanın başlaması serialda çəkilişin başlaması ilə üst-üstə düşdü. Təbii ki, mən yeni il şənliyində ola bilmədim. Bir az anlaşılmamazlıq oldu, məni başa düşmədilər. Seriala çəkiləndən sonra məni tamaşalardan azad etdilər, tam da olmasa tamaşaları azaltdılar. Demək olar ki, 2 ildir ki, rollarım yoxdur. Teatrda taleyim sual altındadır. Teatr mənim üçün nəfəs kimi bir aləmdir. Mən zəif insan və aktyor deyiləm. Bu teatrdan məni uzaqlaşdırsalar, digər teatrlara gedəcəyəm. Əgər onlar da məni qəbul etməsə, öz teatrımı yaradıb, ölkəni tərk edəcəyəm.
- Teatrın rəhbərliyi sizi sıxışdırır?
- Xeyr, əsla! Azərpaşa müəllim Nemətov çox gözəl insan və peşəkar sənətkardır. Onun bəlkə də bu məsələdən xəbəri yoxdur. Mənə bir çox xalq artistləri dəstək oldu, sonradan qarşı çıxdılar.
- Yəqin ki, söhbət Bəsti Cəfərovadan gedir.
- Sırf Bəsti xanım deməzdim. Mən konkret ad çəkmək istəmirəm. Onsuz da teatrda vəziyyətim çox pisdir.
- Məsələ ilə bağlı teatrın rəhbərliyinə müraciət edəcəksiniz?
- Sözün düzü hələ ki, cürət etməmişəm ki, qapısını döyüm. Vallah elə vaxtlar olub ki, mən teatrda yatmışam. Heç pul da istəmirəm, yetər ki, məni tamaşalardan uzaqlaşdırmasınlar. Mən inanıram ki, Azərpaşa müəllimin məsələdən xəbəri olsa, teatrda vəziyyətim başqa cür olar. Onun yanına getsəm, mənə deyəcək ki, gəl tamaşanı oyna.
- O zaman belə çıxır ki, teatrınızı direktor yox, bir neçə xalq artisti idarə edir?
- Xeyr, Azərpaşa müəllim Teatr Xadimləri İttifaqında elə-belə oturmayıb ki, kimsə gəlib teatrı idarə etsin. Azərpaşa müəllim özü bütün teatrları idarə edir. O teatrı hətta sülhlə idarə edir. Bir gənc aktyor kimi istəyirəm ki, mənə dəstək olsunlar. Əgər mən özümü doğrultmasam, çıxıb getməyə hazıram.
Əli Rəhimoğlu
Milli.Az
