B-2 Spirit Amerika strateji bombardmançıları müntəzəm əməliyyatlarda iştirak üçün Böyük Britaniyada yerləşdirilib.
Publika.az “RİA-Novosti” agentliyinə istinadən xəbər verir ki, bu haqda ABŞ Silahlı Qüvvələrinin Avropa komandanlığının məlumatında deyilir.
Məlumata görə, bombardmançılar Ferfordda Kral Hərbi Hava Qüvvələrinin bazasında yerləşdirilib. Qeyd edilir ki, B-2 Spirit-lər BALTOPS və ya “Saber Strike-2017” təlimlərində iştirak etməyəcək və qısa müddətdə Böyük Britaniyada qalacaqlar.
Qeyd edək ki, dünyada ən çox tanınan təyyarələrdən biri, aerodinamik sxeminə görə “uçan qanad” adlandırılan B-2 Spirit bombardımançıları dünyanın ən məhvedici silahlarından biri sayılır. İlk başdan bu təyyarəni strateji nüvə bombardmançısı kimi layihələndirsələr də, “soyuq müharibə”nin sonunda onu adi bombardmançı kimi modifikasiya etdilər. B-2 düşmənin Hava Hücumundan Müdafiə komplekslərindən yan keçə və 40 tona qədər bomba ilə 10 min kilometr məsafəni havada yanacaq doldurmadan qət edə bilir. ”Stels” texnologiyalı (gözəgörünməz) B-2–ni qorxulu edən onun radarlara yaxalanmamasıdır.
B-2 mümkün qlobal qarşıdurmada ABŞ-a üstünlük qazandıracaq silahlardan biri hesab edilir.
Ömər