Bakı. Trend:
“Azərişıq”ASC-nin Mərkəzi Aran Regional Elektrik Təchizatı və Satışı İdarəsinin (RETSİ) yeni tikilən inzibati binası istifadəyə verilib.
ASC-dən Trend-ə verilən məlumata görə, Mərkəzi Aran RETSİ Mingəçevir və Naftalan şəhərləri, eləcə də Ağdaş, Ağsu, Yevlax, Bərdə, Kürdəmir, Göyçay, Goranboy, Tərtər, Ucar rayonlarının daxil olduğu “Azərişıq” ASC-nin Mərkəzi Aran Regional Elektrik Təchizatı və Satışı İdarəsində (RETSİ) 261 min abonentə və bununla da milyondan artıq əhaliyə xidmət göstərir.
İki mərtəbədən ibarət yeni ofis binasında işçilərin səmərəli fəaliyyəti üçün hər cür şərait yaradılıb. Burada abonentlərə xidmətin keyfiyyətinin artırılması, enerji satışı, qəza xidməti, müştəri xidmətləri üçün xüsusi otaqlar yaradılıb. Açılış zamanı "Azərişıq” ASC-nin sədr müavini Vüqar Əhmədov, Mingəçevir şəhər icra hakimiyyətinin başçısı Niyazi Bayramov ölkənin enerji təsərrüfatında həyata keçirilən yenidənqurma işlərindən, iqtisadi və sosial sahədə aparılan kompleks tədbirlərdən danışaraq energetikləri təbrik ediblər.
Bundan əvvəl isə Ağsu, Ucar, Yevlax, Tərtər və Goranboy rayonlarında müasir standartlara cavab verən yeni ofis binaları istifadəyə verilib.
Mərkəzi Aran RETSİ-nin xidməti ərazisində 9 ədəd 110 kv-luq və 55 ədəd 35 kv-luq yarımstansiyalarda yenidənqurma işləri aparılıb, Ağsu və Goranboy rayonlarında 110/35/10 kV-luq yeni yarımstansiya inşa edilib və istismara verilib. Hazırda “Azərişıq” ASC-nin daxili vəsaiti hesabına daha 2 ədəd yeni yarımstansiya tikilir.
Mərkəzi Aran rayonlarında 556 ədəd yüksək gərginlikli, 45.000 ədəd isə aşağı və orta gərginlikli elektrik dayaqları dəyişdirilib. Paralel olaraq, 142 km yüksək gərginlikli, 10-0,4 kV-luq 670 km hava xətləri tikilib, həmçinin 1900 km ÖİN (Özünüdaşıyan İzolyasiyalı Naqillər ) çəkilib.
