Bakıda və Sumqayıtda avtomobil və velosiped oğurluğu ilə məşğul olan şəxslər yaxalanıb.
Lent.az-ın DİN-in saytına istinadən məlumatına görə, iyunun 13-də saat 23 radələrində Xətai rayonu ərazisindən Bakı şəhər sakini Baloğlan Hüseynova məxsus “VAZ-2107” markalı avtomobil qaçırılıb. İyunun 14-də DİN-in Təhlükəsiz Şəhər Xidmətinin əməkdaşları tərəfindən həmin avtomobilin Yasamal rayonu ərazisində hərəkətdə olması aşkar edilib. Görülən tədbirlərlə avtomobil Yasamal RPİ-nin əməkdaşları tərəfindən saxlanılaraq onu idarə edən paytaxt sakini Əli Cəfərovla birgə Xətai RPİ 37-ci PB-yə təhvil verilib.
Suraxanı RPİ 32-ci PB əməkdaşlarının keçirdikləri əməliyyat tədbirləri nəticəsində mayın 19-da və 26-da rayon ərazisində Bakı şəhər sakinləri olan iki nəfərin velosipedlərini oğurlamaqda şübhəli bilinən Yevlax rayon sakini Xəyal Bayramov tutulub.
İyunun 12-də Sumqayıt şəhəri 39-cu məhəllə ərazisindən şəhər sakini Dəyanət Hümbətova məxsus, üzərində mühərriki olmayan təmirə qoyulmuş “KİA” markalı mikroavtobus oğurlanıb. Sumqayıt ŞPİ 3-cü PB əməkdaşlarının keçirdikləri əməliyyat-axtarış tədbirləri nəticəsində hadisəni törətməkdə şübhəli bilinən şəhər sakini Tural Hüseynov tutulub.
