Bakı. 16 iyun. REPORT.AZ/ "Azərbaycanda dayanıqlı inkişaf son dövrdə ayrıca bir istiqamət olub".
“Report” xəbər verir ki, bunu Ailə, Qadın və Uşaq Problemləri üzrə Dövlət komitəsinin sədri Hicran Hüseynova “Dayanıqlı İnkişaf Məqsədlərinin təməl prinsipləri: hüquq bərabərliyi milli prioritetlər və əməkdaşlıq” mövzusunda Ombudsmanların XIV Bakı Beynəlxalq Konfransında deyib.
O bildirib ki, çox qısa bir müddətdə Azərbaycanda bir çox ölkələrdən fərqli olaraq dayanıqlı inkişaf ilə bağlı çoxlu işlər görülüb: "Bu işlərin ən vacibi qanunvericilikdə kifayət qədər dəyişikliklər edilməsidir. Azərbaycanın ən çətin dövrlərində biz ən vacib konvensiyalara qoşulmuşduq. Bu onu göstərir ki, Azərbaycan çox inkişaf edən ölkədir. Xüsusən qadın hüquqlarının müdafiəsi baxımından ölkədə diqqətəlayiq işlər görülüb. Qadınların bu gün iqtisadi baxımdan müstəqilliyi, onların bir çox istiqamətdə sərbəst inkişaf etməsi görülən işlərin nəticəsidir. Çox qısa müddətdə qadın sahibkarların sayını 17 faizdən 25 faizə qaldırdıq. Bizim ən vacib işimiz əhalinin hərtərəfli inkişafına nail olmaqdır".
