Bakı. Ənvər Məmmədov - Trend:
"Red Bull" komandasının pilotu Maks Ferstappen bolidindəki texniki problem səbəbindən Formula 1-də üçüncü sərbəst yürüşü tərk edib.
Trend-in məlumatına görə, 16-cı döngədə (Azneft meydanı) M.Ferstappenin bolidi öz-özünə dayanıb.
Pilot ratsiya ilə mühəndisə bildirib: "Hər şey birdən-birə dayandı".
Qeyd edək ki, iyunun 23-də Bakıda dünyanın ən nüfuzlu idman yarışlarından olan Formula 1 dünya çempionatının 8-ci mərhələsi – Azərbaycan Qran-Prisinə start verilib.
Bu gün üçüncü sərbəst yürüşdən sonra sıralanma turu başlayacaq, yekunda pilotların düzülüşü müəyyənləşəcək. Nəhayət, iyunun 25-də Formula 1 – Azərbaycan Qran Prisinin qalibi məlum olacaq.
Formula 1 bolidlərinin hərəkət etməsi üçün hazırlanan xüsusi yolun – Bakı Şəhər Halqasının müəllifi Herman Tilkedir. Bir dövrənin uzunluğu 6 kilometrdən çoxdur. Ümumilikdə bolidlər 51 dövrə (120 dəqiqə) vurmalıdırlar.