“Məktəblərdə daxili qiymətləndirmə ilə yekun qiymətləndirmənin nəticələri üst-üstə düşmür”. APA-nın xəbərinə görə, bunu Bakı Şəhəri üzrə Təhsil İdarəsinin müdiri Məhəbbət Vəliyeva deyib. M. Vəliyeva bildirib ki, aparılan müzakirələr məktəblərdə formativ qiymətləndirmə ilə bağlı yanaşmaların bütün müəllimlərə tam aydın olmadığını deməyə əsas verir. Onun sözlərinə görə, formativ qiymətləndirmə müəllimin sərbəst həyata keçirdiyi qiymətləndirmədir və müəllim tərəfindən həyata keçirilir.
M.Vəliyeva qeyd edib ki, növbəti tədris ilində əsas hədəflərdən biri qiymətləndirməyə nəzarəti gücləndirmək və bu sahədə birgə fəaliyyəti təşkil etməkdir: “Bu gün məktəbdaxili qiymətləndirmənin vacib komponentlərindən biri də formativ və summativ qiymətləndirmədir. Məktəbdaxili mühitin sağlamlaşdırılması, yaradıcı imkanlardan istifadəyə xüsusi yer ayrılır. Məktəb mühitində hər şey sağlam mühit və münasibətlərdən başlanır. Hər 3 müstəvidə-valideyn, şagird müəllim münasibətlərinin sağlamlığı keyfiyyətə təsir edən vacib amildir. Bu mühitin yaxşılaşdırılmasında məktəblər özləri də maraqlı olublar, bir-birinin təcrübəsindən yararlanıblar. Artıq ümumi məktəb mühitindən sinif mühitinə müraciət edilib. Məktəbin əsas fəaliyyətini təşkil edən müəllimin fəaliyyəti hər zaman diqqət mərkəzində saxlanılır. Müəllim özü bu sahədə vacib bilik bacarıq, səriştəyə yiyələnməlidir. İstənilən fəaliyyətin nəticəsi qiymətləndirilir. Müəllimin də fəaliyyətinin qiymətləndirilməsinə ehtiyac var. Bu gün formativ və summativ qiymətləndirmə sahəsində bu mövzunun aktuallaşdırılmasına və yenidən bu məsləyə qayıdılmasına ciddi ehtiyac var”.
