Avstraliyalı bloger Tiral Dalits Sidney şəhərindən ABŞ-ın San-Dieqosuna qədər aviaşirkətlərin xidmətlərindən istifadə etməyərək gedib.
Publika.az “Daily Mail”ə istinadən xəbər verir ki, 29 yaşlı gənc, üç illik səyahət zamanı təxminən 80 min kilometr qət edib və 50 ölkədə olub.
Səyahət zamanı Dalits öz saytında yol gündəliyi tutur - Avstraliyadan İndoneziyaya, Sinqapura, Malayziyaya, Tailanda gedir. Sonra Laosu, Kambocanı, Vyetnamı və Çini ziyarət edir, daha sonra isə Monqolustandan Rusiyaya keçərək Avropa ölkələrində səyahətini davam etdirir.
Səfər zamanı gənc velosiped, avtomobil nəqliyyatı və qatarlar, eyni zamanda gəmilərdən də istifadə edib. 50 ölkəyə təyyarəsiz səyahət, ona təxminən 22 min dollara başa gəlib.
Bu vəsaiti, bioloji təhsili olan gənc fermada il yarım ərzində işləyərək qazanmışdı.
Amerikanın San-Dieqo şəhərindən isə Dalits doğma Sidneyə qayıtmağı planlaşdırır. Turist bildirib ki, Avstraliyada onu anası və sevdiyi qız gözləyir.
Zaur H.
